د سوېل ختیځ زون د بشر حقونو سیمه ییز دفتر وايي، روان کال ښځو سره تاوتریخوالی زیات شوی.
د بشري حقونو سیمه ییز دفتر وایي، د سویل ختیځ زون دریو ولایتونو کې له ښځو سره د تاوتریخوالي دوه سوه پنځه څلویښت پیښې ثبت شوي چې د تیر کال په پرتله څلویښت سلنه زیاتوالی ښیي.
پکتیا کې د بشري حقونو سیمه ییز دفتر مشر نور احمد شهیم، ناموسي قتلونه، ځان وژنې، وهل ټکول له کور تیښته هغه پیښې یادوي چې له دوی سره یې شکایتونه ثبت شوي دي .
نور احمد شمیم وایي ، چې د روان زیږدیز کال لومړیو پنځو میاشتو کې یې د تاوتریخولي ۲۴۵ پیښې ثبت کړي چې د تیر کال په پرتله ۴۰ سلنه زیاتوالی ښیي .
سویل ختیځ زون کې د بشري حقونو دفتر مشر نور احمد شهیم داسې وویل (( موږ سره روان کال پنځه میاشتو کې د کورني تاوتریخوالي زیاتې پېښې ثبت شوي، په دغو پېښو کې وهل ډبول، وژنې، ګواښل او له کوره تېښتې ثبت شوې دي.))
د ښځو د حقونو فعالانې هم د ښځو پر وړاندې د تاوتریخوالي پیښو پر زیاتیدو اندیښنه څرګندوي او له حکومت یې مخنیوی غواړي .
پکتیا کې د ښځو شبکې مشره زرغونه همت داسې وايي (( ښځو سره د تاوتریخوالي زیاتېدو عمده لاملونه د سواد کچې ټیټوالی، په زور ودونه، لوړ ولور او بې وزلي ده، موږ له حکومت په کلکه غواړو چې دې وضعیت بدلون ته پام وکړي او ستونزې حل کړي.))
د بشري حقونو سیمه ییز دفتر سویل ختیځ زون کې د ښځو پر وړاندې د تاوتریخوالي پیښو زیاتوالي ستر لامل د دا ډول قضایاوو نه څیړل په ګوته کوي .
د بشري حقونو سیمه ییز دفتر د پکتیا، پکتیکا او خوست له چارواکو غواړي چې له ښځو سره د مخ پر زیاتیدونکي تاوتریخوالي په مخنیوي کې مرسته وکړي او اړوند قضایاوې دې په جدي ډول وڅیړي .
