طالبانو په سیمه کې له افغان حکومت سره موازي حرکتونه پيل کړي.
د جګړې له ډګر ور هاخوا طالبانو اوس په سیاسي برخه کې بې سارې اقدامات پيل کړي چې د افغان حکومت سیاسي حیثیت ته یې په مستقیم ډول ضربه رسولې ده.
د طالبانو سیاسي دفتر په ډیپلوماټیکه برخه کې افغان حکومت ته ورته سفرونه او لېدنې پيل کړې چې په دوام یې سر له اوسه اندېښنې شته.
د قطر دفتر مشر ملا برادر له چین وروسته ایران ته په سفر تللی دی.
د طالبانو د سفر جزیات تر اوسه روښانه شوي نه دي، خو برداشت دا دی چې طالبان دغه سفر د سولې د بریا په صورت کې د سیمې هېوادونو د اندیښنو رفع کولو لپاره کوي.
دا هم مالومه نه ده چې طالبان په کومو پاسپورټونو دا وړ سفرونه کوي.
تحلیل کوونکي عبدالوهاب وردګ داسې وايي (( طالبان تر پرونه د قطر له دفتره بیرون نه شو وتلای اما نن وګورئ چین ته ځي، ایران ته ځي دوه ځلې مسکو ته لاړل شاید نورو هېوادونو ته هم لاړ شي او یا تللي وي خو سفرونه به یې نمایانه شوي نه ويو دا د دې مانا ورکوي، چې افغانستان کې طالبان مطرح کړي.))
له دې سره د امریکا او پاکستان د بهرنیو چارو وزیرانو په خپلو خبرو کې د سوله ييز افغانستان په ارزښت ټينګار کړی چې د سيمې د امنيت لپاره اړين دی.
شاه محمود قریشي له مایک پمپیو سره د افغانانو ترمنځ د خبرو د ملاتړ او په دغه لړ کې د مثبت رول ترسره کولو لپاره د پاکستان د کلکې ارادې ژمنه کړې ده.
