امریکا اوس په دې کار کوي، چې افغانستان کې جګړه ختمه او د سیاسي جوړجاړي یوه لار رامنځته کړي.
د امریکا بهرنیو چارو وزارت وایي، دوی په دې کار کوي چې څنګه افغانستان کې جګړه ختمه او د سیاسي جوړجاړي لار ترسیم کړي.
د جنوبي اسیا لپاره د امریکا د بهرنیو چارو وزارت مرستیالې الیس ویلز ویلي له افغانستان سره د امریکا مرستې د سپین چک په معنا نه دي، باید حساب او کتاب یې معلوم وي.
په دې اړه کابل کې تحلیل دادی چې امریکا د سولې په خبرو کې ماته خوړلې خو غواړي چې طالبان د سیاسي مشارکت پراساس له جګړه ییز دریځ راوګرځوي.
په دوحه کې د طالبانو او امریکا ترمنځ خبرې په درېدلې حال کې دي، خو د سولې لپاره فرعي هڅې بیا روانې دي.
امریکا چې افغانستان کې له ټاکنو وړاندې سولې ته رسېدل هدف ټاکلی و، داسې ښکاري چې طالبانو سره د خبرو پایله ناکامه ده.
اوس چې ټاکنې د سولې مخکې شوي امریکا باور لري چې سوله افغانستان کې د سیاسي جوړ جاړي له امله شونې ده.
د جنوبي اسیا لپاره دامریکا د بهرنیو چارو وزارت مرستیالې الېس ویلز داسې ویلي (( اوس د امریکا پام په دې دی چې څنګه افغانستان کې جګړه ختمه شي او د سیاسي جوړجاړي یوه لاره رامنځ ته شي، له افغانستان سره د امریکا مرستې د سپین چک په معنا نه دي، باید حساب او کتاب معلوم وي او افغان حکومت باید لازم اصلاحات راولي، که افغانستان کې جګړه ختمه شي یا امریکا له افغانستان وځي، بیا هم امریکا غواړي چې له افغانستان سره ښیې اړیکې ولري.))
امریکا ، روسیه ،چین او د سیمې ډېر هغه هېوادونه چې افغانستان کې په یو ډول ښکیل دي ظاهراً یې د سولې لپاره هممهاله فعالیتونه پیل کړي خو تاوتریخوالی په خپل اوج کې ده.
له دې سره یو ځای امریکا په پاکستان غږ کړی چې خپله خاوره کې د وسلوالو پرضد مبارزه چټکه کړي.
امریکا باور لري چې د افغانستان له سولې پاکستان زیاته ګټه ترلاسه کولی شي او د ترهګرو ډلو خلاف مبارزه د سیمې امنیت لپاره اړینه ده.
د امریکا د بهرنیو چارو وزیر مایک پمپیو داسې ویلي (( په سیمه کې له ترهګرو ډلو څخه د پاکستان د ملاتړ په تړاو مو سخت دریځ نیولی دی.))
د طالبانو له ګواښ سربېره د القاعده بیا سر راښکاره کول او د داعش په اړه د لوړ پوړو امریکايي چارواکو څرګندونې له جدي اندېښنو دي چې ښايي د سولې په اړه هڅې له ننګونو سره مخ کړي.
تازه لانګ وار ژورنال ویبپانې د هند د لویې وچې لپاره د عاصم عمر په نامه د القاعده شبکې پخواني مشر نقل قول راخیستی چې امریکا یې له پرمختللې ټکنالوژۍ سره د طالبانو په وړاندې ماته ګڼلې.
القاعده شبکې افغانستان کې د امریکا خلاف جګړه کې د طالبانو د مبارزې ستاینه کړې ده.
