.د ضیا یفتلي په تړاو ولسي جرګه د څارنوالۍ مکتوب نه ځوابوي
ولسي جرګې د څارنوالۍ هغه مکتوب ته لا هم ځواب نه دی ویلی چې د ضیا یفتلي د جرم په تور یې ورلیږلی و.
ضیا یفتلي محکمې د فساد په تور شپږ میاشتې بند باندې محکوم کړی، خو د جرګې فعال غړی دی او حاضر نه دی چې زندان ته لاړ شي.
ولسي جرګه بیا وایي، تر هغې به د څارنوالۍ د مکتوب ځواب ور نه کړي، تر څو چې پلاوی نه وي ټاکل شوي.
د اداري فساد پرضد د مبارزې عدلي او قضایي مرکز په اسنادو او شواهدو ځينې چارواکي محاکمه کړي، د بند سزا یې ورته اورولې، خو دا چې قوي ملاتړي لري، پولیس نه دي توانیدلي چې زندان ته یې واچوي.
ضیا یفتلي چې اوس د ولسي جرګې غړی دی، دفاع وزارت کې یې د اوه نورو کسانو سره ۱۷ میلیونه افغانۍ فساد کړی و، په شپږ میاشتې بند محکوم شوی، خو ازاد ګرځي.
لوی څارنوالۍ ولسي جرګې ته مکتوب لیږلی، خو دا چې د جرګې ریس او اداري پلاوی نه دي ټاکل شوي، د مکتوب ځواب نه شي ورکولی.
د کورنیو چارو وزارت مسوولیت لري چې دا ډول کسان ونیسي او زندان ته یې واچوي، خو دا چې له دې قضیو کلونه تیریږي، کورنیو چارو وزارت وایي، اړونده ادارو ته مکتوبونه نه دي رسیدلي، ځکه دا کار ځنډنی دی.
یوسف نورستانی اوس د مشرانو جرګې غړی دی، هرات کې یې د ولایت پرمهال فساد کړی و، څو ورځې وړاندې به بند محکوم شو، خو نه دی بندي شوی.
په دې تړاو باندې مشرانو جرګه خبرو کولو ته نه حاضر کیږي٬ چې یوسف نورستانی يې ولي څارنوالۍ ته نه دی معرفي کړی.
په پارلماني چارو کي د دولت وزارت بیا یوازې ځان ته د هماهنګ کوونکي نوم ورکوي او دې قضیو کې نه صلاحیت لري او نه پرې کار لري.
