د بالامرغاب ولسوالۍ یوې سیمه یېزې امنیتي سرچینې شمشاد ته وویل چې د چهارشنبې په شپه دغه ولسوالۍ کې د طالبانو او افغان ځواکونو ترمنځ سختې نښتې شوي دي.
د سرچینې په وینا د طالبانو د بریدونو په پایله کې امنیتي ځواکونه اړ شوي چې د ولسوالۍ دفتر او امنیه قومندانۍ طالبانو ته پرېږدي.
یاده سرچینه وايي، امنیتي ځواکونه د بالا مرغاب سیند بلې غاړې ته د ملي پوځ کنډک سره یوځای شوي دي.
د بادغیس د والي ویاند جمشید شهابي هم مني چې د چهارشنبې په شپه بالامرغاب کې سختې نښتې شوي خو د ولسوالۍ د سقوط خبر ردوي.
هغه وايي، دغه جګړه کې دواړو لوروته مرګ ژوبله اوښتې خو کره شمېره یې نه ده مالومه.
د بادغیس د ولایتي شورا مرستیال عبدالله افضلي وايي، بادغیس کې له تېرو څو ورځو راهیسې د طالبانو او افغان ځواکونو ترمنځ جګړې روانې دي.
هغه وايي، تېره شپه هم دغه ولسوالۍ کې سختې نښتې شوي خو تازه جزیات یې نه لري.
