ملي امنیت شورا سلاکار په اسلام اباد کې له پاکستاني چارواکو سره په سیمهییز اقتصادي اتصال او ترهګرۍ ضد مبارزه باندې خبرې کړي.
حمدالله محب له لوړپوړي پلاوی سره تېره ورځ اسلام اباد ته تللی او لومړۍ لیدنه یې د پوځ له مشر قمر باجوه سره کړې.
له دې سره کابل کې شنونکي ټینګار کوي چې د ولسمشر غني څلور کلن فشار پاکستان همکاریو ته اړ کړی او باید ګټه ترې واخیستل شي.
د افغانستان دملي امنيت شورا سلا کار حمد الله محب ،چې تېره ورځ اسلام اباد ته تللی هلته يې د پوځ له مشر قمر جاويد باجوه سره ليدلي.
د امنیت شورا سلاکار حمدالله محب او د پاکستان د پوځ مشر قمر باجوه ليدنه کې د افغان سولې په پروسه ، ترهګرۍ سره د مبارزې په همکارۍ او سيمه اييز اقتصادي اتصال خبرې کړي دي.
پاکستان چې د افغان جګړې یو اړخ بلل کیږي، تراوسه د افغان جګړې د پايته رسېدو برخه کې داسې اقدام نه دی کړی چې افغان حکومت او افغانان قانع کړي.
اوس ټینګار دا دی چې پاکستان تر فشارونو لاندې دی او افغان حکومت ته پکار ده چې د دوه اړخیزو همکاریو او ګډو ګټو لپاره ترې کار واخیستل شي.
د ملي امنيت شورا سلا کار سره په دې سفر کې د کورنيو چارو سر پرست وزير مسعود انداربي او يو شمېر نور لوړ پوړي امنيتي چارواکي هم شامل دي.
پاکستان ته د افغان پلاوي دا سفر په داسې مهال کې ترسره کېږي، چې ټاکل شوې ولسمشر غني هم د لومړي وزير عمران خان په رسمي بلنه پاکستان ته سفر وکړي ؛ خو د سفر کره نېټه يې لا نه ده مالومه.
راپور: محبوب الهی
