.جنرالان به هم د اړتیا په صورت کې خپل سرتیري سره اوږه په اوږه وجنګیږي
کابل کې د پوځ له تعلمي مرکز نږدې درې زره افسران، بریدملان او سرتیري فارغ شول.
ملي دفاع وزارت وايي، جنرالان او د دفاع وزارت لوړ رتبه کسان به د سختۍ په مهال د خپلو افسرانو ترڅنګ وي او د دوی ترمنځ شته واټن به له منځه لاړ شي.
دفاع وزارت نږدې درې زره تازه فارغ شویو افسرانو، بریدملانو او سربازانو ته په خطاب کې خبرداری ورکړی، که د جګړې په مهال مو پښې ولړزېدې، ژوند له لاسه ورکوئ.
دفاع وزارت مني، چې د اردو په لیکو کې داسې خلک شته چې د نورو حقوق تر پښو لاندې کوي، خو ژمنه کوي چې مخه به یې ونیسي.
تازه د کابل پلچرخي له نظامي تعلیمي مرکز ۲۷۶۸ افسران، بریدملان او سربازان فارغ او د جګړې ډګر ته به واستول شي.
دفاع وزارت لومړي مرستیال محمد یاسین ضیاء فارغ شویو ته په خطاب کې وویل، ستاسو ایمان ستاسې غوره وسله ده او که د جګړې په مهال مو پښې ولړزېدې، وژل کېږئ.
محمد یاسین ضیاء د افغان ځواکونو جګړه برحقه او د دوی پر وړاندې جنګېدونکي کسان خوارج او باغیان وګڼل.
کابل کې د غوڅ ملاتړ ماموریت باوري دی چې تر مسلکي زده کړو وروسته به افغان ځواکونه د جګړې په مهال بریالي وي.
کابل کې د غوڅ ملاتړ ماموریت یو قوماندان تورچیک داسې وویل (( موږ له تاسو سره اوږه په اوږه ولاړ یوو، او د سولې برخه کې هم ستاسې ملاتړ کوو، باوري یم چې تر مسلکي زده کړو وروسته کولی شئ له خپلې خاورې ساتنه وکړئ.))
دغه فارغ شویو کسانو ۱۲ اوونۍ بیلا بیلې زده کړې کړي چې سیمه ییز ځواکونه هم په کې شته او وایي، په لوړ مرام به خپلې دندې ته دوام ورکوي.
