عبدالله عبدالله کابینه کې وروستي بدلونونه سیاسي پرېکړه یادوي.
اجرايه رياست کابينه کې وروستي بدلونونه سياسي پرېکړه یادوي چې کمپایني بڼه لري.
د ملي يووالي حکومت اجرايه مشر عبدالله عبدالله وايي، کابينه کې وروستي بدلونونه يوه سياسي پرېکړه ده، چې خلکو او د ولسمشرۍ نوماندانو ته يې سوال پيدا کړی.
اجرايه رياست اندیښنه لري چې په راتلونکو څلورو مياشتو کې نوي وزيران نه شي کولی خپلې چارې په سمه توګه تر سره کړي.
د ملي يووالي حکومت اجرايه رياست وايي، د ولسمشر غني لخوا وروستۍ ټاکنې سياسي بڼه لري، چې ملت او نوماندانو سره یې پوښتنې پيدا کړي دي.
عبدالله عبدالله د وزیرانو شورا غونډه کې ویلي، د اجرايه رئيس په توګه شرمېږي، چې د وزيرانو په کچه ادلون بدلون کې هېڅ خبر نه ورکول کېږي.
عبدالله عبدالله وویل (( ما واقعاً د حکومت د اجرایه رییس په توګه خجالت وویست، چې د یو وزیر دنده پای ته رسېدلې وه له ما یې پوښتنه وکړه، چې تاسو په جریان کې یاست ما ورته وویل نه. زه بیخي خبر نه یم.))
عبدالله عبدالله وايي، د ټولنيزو رسنيو له لارې خبرېږي، چې وزير منفک شوی او د بل حکم ورکړل شوی دی.
هغه داسې وویل (( یو ورځ دوه ورځې اوازه وي، خو ګورې چې په ټولنیزو رسنیو کې حکم خپور شي، د دنیا په کوم ځای کې دا دود دی چې د کار اجرا په دې شکل وشي، متاسفانه دا هغه څه دي، چې زه نه غواړم خو بیا هم همداسې کیږي.))
اجرايه رياست وايي، روان حالت ته کتو د خدماتو وړاندې کول بايد ټکني نشي او انکشافي پروژې دې په دوامداره توګه پر مخ ولاړې شي.
