د افغان سولې لپاره د امریکا ځانګړي استازي، زلمي خلیلزاد امریکايي سناتورانو ته له طالبانو سره د خبرو په تړاو معلومات ورکړي دي.
خلیلزاد تیره ورځ د امریکا سنا جرګې ته وربلل شوی و او هغه په قطر کې له طالبانو او د یادې ډلې له سیاسي مرستیال، ملابرادر سره د خبرو او لیدنې جزییات او مالومات د بندو دروازو ترشاه وړاندې کړي.
امریکايي سناتور تاد یانګ په غونډه کې د افغان سولې په تړاو له خلیلزاد وضاحت غوښتی.
تاد ویلي، موږ باید د دغه موضوعاتو په تړاو سنا مجلس کې هم پوه شو، موږ نور نشو کولای چې دغه موضوعات یوازې اجراییوي برخې ته پرېږدو.
بل امریکایي سناتور جېم ریسچ ویلي، باور لري چې خلیلزاد به د سولې خبرو کې پرمختګ کړی وي، خو لا هم معلومه نه ده چې څومره پرمختګ یې کړی او ایا پای ته یې رسولی شي؟
زلمي خلیلزاد په تېرو اوو میاشتو کې شپږ ځله په قطر کې له طالب استازو سره ناستې او خبرې کړي.
ویل کېږي، د طالبانو او امریکا ترمنځ په دغه خبرو کې د پام وړ پرمختګونه شوي، خو په افغانستان کې یې د جګړې پر ډګر اغېز نه ده کړې او لا هم نښتې روانې دي.
امریکا بیا وايي، خبرې مهم پړاو ته رسېدلې او د لا ډېر پرمختګ لپاره لا ډېرو بحثونو ته اړتیا ده.
