د ملي امنیت شورا سلاکار حمدالله محب د هلمند د پېښې د څېړلو لپاره پلاوی ټاکلی او د پایلو شریکولو ژمنه یې کړې ده .
ملي امنیت شورا د هلمند د هغې پېښې د څېړنې لپاره پلاوی ټاکلی چې افغان پولیس هوایي برید کې وژل شوي او ټپيان دي.
د جمعې په شپه له طالبانو سره د نښتې پرمهال بهرنیو ځواکونو هوایي برید کړی چې افغان سرتېري پکې په نښه شوي دي.
لومړنۍ موندنې ښيي چې برید د ناسمې همغږۍ له امله شوی دی.
په دغه پېښه کې د کندهار ـ هلمند د لویې لارې ساتنې کندک د قومندان په ګډون ۱۷ افغان سرتیري وژل شوي او ۱۴ نور ټپيان دي.
دغه تازه برید خلک په غصه کړي او آن د غچ اخېستلو ګواښ کوي، خو د ملي امنیت شورا ددې پيښې د څېړنې لپاره یو با صلاحیته پلاوی ټاکلی او ژمنه یې کړې، چې پاېلې به یې ولس سره شریکې کړي.
د هلمند ولایتي شورا هم پر ولایتي چارواکي نیوکه کوي چې د شپینو عملیاتو او هوایي بریدونو پر مهال له بهرنیو ځواکونو سره همغږي نلري.
د ولایتي شورا رئیس عطاءالله افغان له نړیوالو د دغه برید کونکو د محاکمې کولو غوښتنه کوي.
د هلمند لوړ پوړي چارواکي په دې تړاو خبرو ته نه حاضرېږي خو د قوماندانۍ د پولیسو مطبوعاتو مسوول د وژل شوو شمېر ۹ او ټپيان ۱۵ یادوي.
خو محمد زمان همدرد په دې تړاو ډېر جزیات ورنه کړل چې ولې پر افغان سرتیرو برید شوی دی.
څو میاشتې وړاندې په ګرشک ولسوالۍ کې هم د هوایي برید پر مهال ۱۸ افغان سرتیري ووژل شول او ۵ نور ټپیان شول.
د ملي امنیت شورا سلاکار حمدالله محب د یادې پېښې د څېړلو او له خلکو سره یې د پایلو شریکولو ژمنه کړې ده .
