د رای ورکوونکو د نوم لیکنې پروسه وځنډېده.
راتلونو ټاکنو ته په ټاکلې نېټه د رای ورکوونکو تقویتي نوم لیکنه و نه شوه.
د زماني مهالویش مطابق د ثور شپږویشتمه د نوم لیکنې لپاره ټاکل شوې وه، خو د کمېسیون د نه چمتوالي له امله دا پروسه نامالوم وخت ته وځنډیده.
بل خوا د امریکا سفارت ټینګار کړی چې ټاکنو کمېسیون دې ولسمشریزو ټاکنو عملي پروسې ته لاړ شي خو په ټاکنو د څار بنسټونه په ټاکلې نېټه ټاکنې ناشونې بولي.
د راتلونکو ټاکنو لپاره د ثور ۲۶مه په زماني مهالویش کې د رای ورکوونکو د نوم لیکنې نېټه ټاکل شوې وه خو کمېسیون ونه توانېد چې نوم لیکنه پیل کړي.
د تقویتي نوم لیکنې د ځنډ د لاملونو په بیانولو ټاکنو کمېسیون خپل ویاندویان له رسنیو سره له خبرو بند کړي.
له اوږده انتظار وروسته هم د کمېسیون رهبرۍ د نوم لیکنې په ځنډ خبرې ونه کړې.
په ټاکنو د څار بنسټونو ته هم کمېسیون د نوم لیکنې د ځنډ لاملونه نه دي ویلي، دا کار د څار بنسټونو د کمېسیون بې کفایتي بولي چې په ټاکلې نېټه یې نوم لیکنه ونه کړه.
بل خوا کابل کې د امریکا سفارت په ټاکنو کمېسیون غږ کړی چې راتلونکو ټاکنو عملي پروسې ته داخل شي او چمتوالی ورته ونیسي.
کابل کې د امریکا سفارت داسې ویلي (( ټاکنو کمېسیون دې پر ولسمشریزو ټاکنو تمرکز وکړي، امریکا په افغانستان کې له رڼو ټاکنو ملاتړ کوي، او ټاکنو کمېسیون دې د راتلونکو ټاکنو لپاره عملي لارې وکاروي)).
بل خوا بیا ټاکنو کمېسیون بایومتریک نوم لیکنې ته هم چمتو نه ښکاري او د کمېسیون اوسنیو ظرفیتونو ته په کتو په ټاکنو د څار بنسټونه باور لري چې د میزان په ۶مه به ولسمشریزې ټاکنې ونه شي.
ټاکنو کمېسیون د ټاکنو نوي قانون په اساس مکلف دی چې بایومتریک نوم لیکنه وکړي خو دا چې وخت کم ښکاري، ممکن قلمي نوم لکینه وشي. د نوم لیکنې لپآره په زماني مهالویش کې د ثور له ۲۶مې د جوزا تر ۲۴مې وخت ټاکل شوی، خو اوس به دا نېټه تغیر کېږي.
