د بریټانیا اقتصاد پوه وایي، افغانستان کې جګړې د اقتصادي ودې مخنیوی کړی.
جګړې او بې ثباتۍ د اقتصاد د ودې او پر مختګ مخه نېولې.
د بريټانیا اقتصادي کارپوه نېکلس لي باور لري که افغانستان کې جګړه پای ته ورسېږي اقتصادي ودې ته زمینه برابریږي چې ورسره به د فقر کچه هم را ټيټه شي.
نوموړی د کورنیو ډېر نفوس یو له هغو لاملونو یادوي چې د اقتصاد د پراختیا بهیر ټکنی کوي او فقر زیاتوي.
د نړیوالې اقتصادي پراختیا برخه کې بريټانیوی اقتصاد پوه باور لري چې؛ افغانستان کې د جګړې پای اقتصادي ودې او د فقر له منځه وړلو ته لار پرانیزي.
هغه له خبریالانو سره په یوه ګډه ناسته کې د تېرو کلونو په پرتله افغانستان کې د صحت او زده کړو برخه کې لاسته راوړنې د پام وړ یادې کړې او د هېواد په بیلابیلو برخو کې د ظرفیت لوړنې لپاره یې د بريټانیا مرستې اغیزمنې وبللې.
بريټانیوی اقصاد پوه نېکلس لي داسې وویل (( دا هغه پرمختګونه دي چې افغانان یې له مخې روغتونونو ته لاس رسی لري. د هغه خلکو فیصدي چې د دوه ساعته په موده کې یې روغتونونو ته لاسرسی مونده له ۲۰۰۶م کال راهېسې له ۶۰ سلنو نه ۹۰ سلنو ته لوړه شوې ده.))
لي د زیږون پرمهال نه واټن او د کورنیو ډېر نفوس یو له هغو لاملونو یاد کړ چې د افغانستان په څېر هېوادونو کې یې فقر زیات کړی او د پرمختګونو مخه یې ډب کړې ده.
نوموړی باور لري که د کورنیو نفوس کڼټرول شي حکومت ته د خدمتونو وړاندې کول او ټولو وګړو ته رسیده ګي اسانه کیږي.
نېکلس لي وویل ((موږ اوس له نړۍ نه هم کره شواهد لرو چې کله نفوس چټکه وده وکړي؛ نو د پرمختګ اړخ ډېر سختېږي. پکار دا دی چې د زیږون پرمهال واټن رامنځ ته شي او کم نفوسه هېوادونه خدمات زیات وړاندې کولای شي))
د تازه ارقامو له مخې افغانستان کې له دوه پنځوس سلنې ډېر خلک د فقر کرښې لاندې ژوند کوي او تر څلور میلون ډېر د کار په شرایطو برابر افغانان بې روزګاره دي.
که څه هم حکومت د تېر کال په پرتله سږ کال اقتصادي وده ښه بولي خو عام افغانان له دغه بهیره راضي نه دي او فقر سره د مبارزې لپاره د حکومت له پالیسیو نا خوښ دي.
