والي حیات الله حیات د کندهار د پوهنې بهیر په بد وضعیت اندېښنه وښوده.
د کندهار والي وايي، د دغه ولایت د پوهنې بهیر تر بل هر وخت په بد حالت کې دی.
د کندهار ولایتي چارواکو د يوې پراخې غونډې پر مهال د دې ولایت د پوهنې د بهير د اصلاح په موخه د کندهار له مدني فعالانو، پخوانيو ښوونکو، د پوهنتونونو د استادانو، قومي مشرانو، مېرمنو او ځوانانو سره د دې ولایت د پوهني د بهير پر ستونزو بحث وکړ.
د کندهار والي ناستي ته په خبرو کې
حیات الله حیات وویل د کندهار د پوهنې بهير له داخلي او باندنيو ستونزو سره مخ دی.
د والي په خبره، په داخل کې د مديريت ضعف او له بهره بيا په دغه بهير کې د ځيني کسانو لاسوهنې د کندهار ښوونیز بهیر اغيزمن کړی، خو ولایتي ادارې يې د اصلاح لپاره تازه هڅې پیل کړې دي.
وویل، چې د کندهار د پوهني بهير له داخلي پلوه له مديريتي او تخنيکي ستونزو او له بهره بيا د لاسوهنو، د خلګو د نه همکارۍ، کم پوهاوي او یو لړ امنیتي ننګونو سره مخ دی، چې دې کار دې ولایت کې د پوهني پر بهير منفي اغيز کړی.
والي وایي د کندهار له اوسېدونکو سره تر مشورو وروسته به د پوهنې رياست د اصلاح لپاره يوه هر اړخېزه تګلاره جوړوي.
د کندهار اوسېدونکي هم د پوهنې اوسنی بهیر د فساد او نورو ستونزو څخه ډک بولي او د کندهار په پوهنې ریاست کې د ستونزو د اساسي حل غوښتونکي دي.
کندهار په خپل تشکېل کې ټول ۵۸۶ بابه ښوونځي لري، چې له ډلې يې ۴۷۶ بابه فعال او سل نور د زده کوونکو پر مخ د بېلا-بيلو لاملونو له وجي تړلي دي.
په فعالو ښوونځیو کې (درې-لکه-دېرش زره) زده کوونکي دا مهال په زده کړو بوخت دي، چې اکثره یې د کتاب له نشت او سالم درسي چاپيريال د نه موجوديت له ستونزو څخه کړيږي.
