امریکا د افغانستان ولسمشریزو ټاکنو په لومړیتوب ټینګار کوي.
امریکا افغانستان کې د اوږدمهاله پوځي حضور تر څنګ ټاکنو پروسه کې د همکاریو او مرستو ډاډ ښودلی دی.
ویلز له افغان چارواکو سره لیدنو کې د امریکا ژمنې تازه کړي او په یو شمېر برخو کې یې د مرستو په دوام ټینګار کړی.
ویلز له افغان ولسمشر سره په لیدنه کې په هغو وړاندیزونو هم بحث کړی چې په یو لیک کې له ټرمپ غوښتل شوي وي.
داسې ښکاري چې د سولې پروسه اوږده ده او امریکا د افغانستان د ولسمشریزو ټاکنو په لومړیتوب باندې ټینګار کوي.
د مرکزي او سویلي اسیا لپاره د امریکا د بهرنیو چارو وزارت مرستیاله الیس ویلز په کابل کې د حکومتي مشرانو سره لیدنو کې ډاډ ورکړی چې د خپل حضور تر څنګ به ټاکنو کې د پام وړ مرسته وکړي.
ویلز له ولسمشر غني سره لیدنه کې بیا په هغه لیک بحث کړی چې ټرمپ ته څو میاشتې وړاندې لیږل شوی و او د مصارفو د کمولو او سپما غوښتنه پکې شوې وه.
د ارګ په اعلامیه کې داسې راغلي (( ولسمشر محمد اشرف غني او مېرمن ویلز د افغانستان د سولې پروسې د پرمختګونو، د سولې مشورتي لویې جرګې د بریالي ترسره کېدو او پایلو ،پر ټاکلي وخت د ولسمشریزو ټاکنو د ترسره کېدو د ارزښت او ټرمپ ته لیږل شوي لیک باندې بحث وکړ.))
په همدې تړاو کابل کې د امریکا سفارت لخوا د خپرې شوې اعلامیې په یوه برخه کې داسې راغلي (( الیس ویلز د امریکا د ملکي مرستو د بیاکتنې په غونډه کې ګډون کوي چې د افغانستان بنسټونه پیاوړي کړي، افغانان به په خپلو پښو ودروي او دغه راز به په ډاګه کړي چې امریکا د افغانستان په ټولنیز او اقتصادي برخو کې څومره پانګونه کړې او افغانستان کې څومره پرمختګونه شوي دی.))
د امریکا سفارت په اعلامیه کې راغلي چې وېلز به افغانستان کې ټولو ښکیلو خواو سره د ولسمشریزو ټاکنو په تړاو بحث وکړي او له رڼو ټاکنو به ملاتړ اعلان کړي.
