مشرانو جرګې په شپنیو عملیاتو کې د ملکي تلفاتو باندې اندېښنه وښوده.
مشرانو جرګه وايي د حکومت په عملیاتو کې د ملکي تلفاتو کچه لوړه شوې او دغه ډول عملیات ورته دمنلو نه دي .
دغه جرګه وايي د دې پر ځای چې امنیتي ځواکونه د ولس امنیت ټینګ کړي بلکې وژني یې او له دغه کاره مخالفین ګټه اخلي .
سناتورانو د خپلې یکشنبې ورځې غونډه کې د ملکي مرګ ژوبل پر زیاتوالي اندیښنه وښوده .
د مشرانو جرګې رییس فضل هادي مسلمیار وايي د شپنیو عملیاتو مخالفت نه کوي خو چې د مخالفینو پر وړاندې وي نه د ملکي وګړو .
مسلمیار وايي ډير کم شپني عملیات دي چې مخالفین پکې په نښه کیږي او داسې عملیات چې ډیری قرباني یې عام وګړي وي ورته د منلو نه دي .
سناتورانو بیا ویل د دې پر ځای چې امنیتي ځواکونه د خلکو امنیت خوندي کړي پر کورونو یې ورځي، وژني یې او له دغه فرصته مخالفین ګټه اخلي، خپلو لیکو ته یې جذب وي .
د مشرانو جرګې غړو همداراز د امریکا او طالبانو ترمنځ پرشویو مذاکراتو هم نیوکه وکړه چې ګني له افغان سولې سره مرسته نه شي کولای .
د دوی ټینګار پر دې و ترهغې چې په مذاکراتو کې افغان لوری شریک نه شي پایله نه ورکوي .
د امریکا او طالبانو ترمنځ د سولې شپږم پړاو خبرې پای ته رسیدلي د بل پړاو خبرو لپاره تابیا نیول کیږي ، د تمې او هیلو خلاف د جګړو په شدت کې کموالی نه دی راغلی او بریدونو لا زور اخیستی.
