پښتون ژغورنې غورځنګ(پيټياېم) د پاکستان په زندانونو کې د خپلو بندي غړو او د رهبرۍ شورا مخکښ غړي، صمد خان د خوشي کولو او دغه راز په سیمه کې د امنیت ټینګښت لپاره احتجاجي لاریون وکړ.
د دې غورځنګ مخکښ غړي زکیم خان د پښتون ژغورنې غورځنګ له ملاتړو غوښتي چې په پراخه کچه د سولې او امن لپاره خپل ملاتړ ته دوام ورکړي.
زکیم خان ویلي: « تاسو وینی چې له تېر یوه نیم کال راهیسې په بنو کې د ریاستي دهشتګردۍ یوه اډه جوړه شوې، د بنو ټولې لارې بندې دي او خلک په نهايي تکلیف کې دي. د بنو له بازار ها خوا نورې علاقې هم د ریاستي دهشتګردۍ کوربه دي، خلک له کورونو ایستل کېږي او کاروبار په ټپه ولاړ دی. همدارنګه په دې ولسي پاڅون کې د صمدلالا د خوشي کولو غوښتنه کېږي.»
په ورته مهال، د یاد غورځنګ ملاتړي وایي، پوځ دې په پاکستان او خيبرپښتنونخوا کې د پښتنو پر وړاندې روان تاوتریخوالی بند کړي.
د پښتون ژغورنې غورځنګ ملاتړی وايي: « د پاکستان ریاست باید زموږ غوښتنې ومني او زموږ بندي خلک را خوشي کړي.»
د پښتون ژغورنې غورځنګ یو بل غړی وايي: « تاسو وینی چې د پاکستان ریاست هره ورځ د جګړې او نا امنیو جوړولو نوې پروژې اخلي. دا جګړې زموږ نه دي بلکې د بهرنیو هېوادونو جګړې دي او ګټه یې هم پنجاب ته رسېږي. په دې جګړو کې خاوره او وینه د پښتون کارول کېږي او ګټه یې پنجاب کوي. د پاکستان ریاست کوشش کوي د پښتون ولس هغه واقعي استازي بندي او غږونه یې بند کړي چې د خپلو خلکو ازادي غواړي.»
د بشري حقونو مدافعان هم په پاکستان او خیبر پښتونخواه او نورو پښتون مېشتو سیمو کې د پاکستان روان ظلمونه غیر انساني بولي او له نړیوالو سازمانو غواړي چې دا ځورونې وغندي او د درولو لپاره یې کار وکړي.
تر دې وړاندې د پښتون ژغورنې غورځنګ مشر په خیبر پښتونخواه او نورو پښتون مېشتو سیمو کې د پاکستان پوځي رژیم د روانو ظلمونو پر وړاندې د پښتنو را ویښولو ترڅنګ، په نړیواله کچه هم خپل غږ پورته کړی.
دوی له نړیوالې ټولنې، ملګرو ملتونو او نړیوالو سازمانونو هم غوښتي چې د پښتنو غږ واوري او خيبرپښتنونخوا کې د پښتنو پر وړاندې روان تاوتریخوالې پای ته ورسوي.
