د ایران دولتي خبري اژانسونو راپور ورکړی چې مجتبی خامنهيي د دې هېواد نوی مذهبي مشر او د خپل پلار ایتالله سید علي خامنهيي ځای ناستی ټاکل شوی.
پر ايران د اسرایيلو او امريکا د بريد له پيل لږ وروسته چې د علي خامنهيي ژوند بایلل تایيد شول، داسې ګنګوسې خپرې شوې چې زوی يې مجتبی خامنهيي د هغه ځای ناستی انتخاب شوی، خو په ايران کې دا ستره پرېکړه د يکشنبې په ورځ رسما ً اعلان شوه.
مجتبی خامنهيي د ایران درېيم مذهبي مشر دی او لومړی هغه دی چې له خپل پلار څخه دا دنده ور پاتې کېږي.
نوموړی له ۲۰۱۹ کال راهیسې د امریکا له بندیزونو سره مخ دی.
فاکس نیوز د امریکا ولسمشر له قوله ویلي، د ایران لپاره د نوي مذهبي مشر په توګه د مجتبی خامنهيي له ټاکل کېدو خوښ نه دی او نه هم ورته د منلو وړ دی.
ډونالډ ټرمپ ویلي: « د ایتالله خامنهیي زوی مجتبی خامنهیي راته د منلو وړ نه دی. موږ هلته داسې څوک غواړو چې ایران ته سوله او د خلکو ترمنځ همغږي راولي. هغه هسې وخت ضایع کوي او یو کمزروی کس دی. باید واضېح ووایم چې په ایران کې د راتلونکي مشر په ټاکلو کې زه باید ونډه ولرم؛ داسې لکه څنګه چې مې د وېنزوېلا مشر په ټاکلو کې رول درلود. باید د ایران نوی مشر زموږ تایید ترلاسه کړي. که داسې ونه شي، هغه به هم ډېر وخت ژوندی پاتې نه شي.»
ټرمپ له دې وړاندې ويلي وو چې غواړي شخصا د ايران مذهبي مشر په ټاکلو کې دخيل شي. د هغه په خبره، امریکا د ایران لپاره یو جلا او د دوی د تایید وړ مشرتابه غواړي.
د ایران نوي مذهبي مشر له ټاکل کېدو سره هممهاله، د اسرایيلو پوځ په یوه خپاره کړي پیغام کې د ایران خبر ګانو جرګې(شورای خبرگان رهبری) ته ګواښ کړی چې که د نوي مشرتابه د ټاکلو لپاره راټول شي، برید به پرې وکړي.
د اسراییلو پوځ ویلي: « د ایران خبرګانو جرګه به چې لسیزې کېږي کومه غونډه یې نه ده کړې، ژر په قم ښار کې راټوله شي. اسراییل به هر هغه کس چې ځای ناستی ټاکل کېږي او هر څوک چې د ځای ناستي په ټاکلو کې برخه اخلي، تعقیب کړي. موږ هغو ټولو کسانو ته چې د ځای ناستي د ټاکلو په ناسته کې د ګډون هوډ لري، خبرداری ورکوو چې ستاسې په هدف ګرځولو کې به هم دوه زړه نه شو.»
ځینې کتونکي په دې باور دي چې مجتبی خامنه يي هم ښايي د خپل پلار سخت دریځه تګلاره جاري وساتي؛ حال دا چې ځینې نور بیا په دې باور دي چې د امریکا او اسراییلو په بریدونو کې يې د کورنۍ د غړیو وژل کېدل ښايي هغه د لوېدیځ فشارونو ته د تسلیمېدو پر وړاندې لا سخت دریځی کړي.
د نړیوالو چارو شنونکی شېرحسن حسن وايي: « ایران ته په اوسنیو حالاتو کې د تصمیم نیولو د یوه مرکز لرل ډېر مهم دي. که څه هم په دې خبره باندې بحثونه کېږي چې د تصمیم مرکز باید د پلار له مړینې وروسته په میراثي بڼه زوی ته نه وای انتقال شوی.»
پخوانی ډېپلومات عزیز معارج وايي: « د مجتبی پلار علي خامنه يي د امریکایانو له خوا د خپلو ګټو لپاره ووژل شو؛ که چېري مجتبی هم له لوېدیځ او په ځانګړې توګه امریکا سره توافق ونه کړي او د خپل پلار لاره تعقیب کړي، ښايي دی هم له صحنې حذف کړي.»
مجتبی حسیني خامنهيي په ایران کې د واک په هرم کې یو له خورا پټو او مرموزو څېرو شمېرل کېږي.
د خپل پلار علي خامنه يي برعکس، مجتبی په عامه ژوند کې خپل ځای په لویه کچه محدود ساتلی، نه یې کومه حکومتي دنده کړې، نه یې په ډاګه ویناوې خپرې شوې، نه یې هم له رسنیو سره مرکې کړې او په همدې اساس د نوموړي یوازې لږ شمېر عکسونه او ویډیوګانې خپرې شوې دي.
سره له دې، له کلونو راهیسې په نظام کې دننه د هغه د اغېز لرلو په اړه اوازې شته دي، ځکه هغه له خپل پلار سره د اړیکو یو له مهمو لارو و.
مجتبی حسیني خامنهيي د ۱۹۶۹ کال د سپټمبر په ۸مه په مشهد کې زیږېدلی او د اسلامي جمهوریت د ستر روحاني مشر علي خامنهيي دویم زوی او د هغه له شپږو بچیانو یو دی.
