د امریکا د متحده ایالاتو ولسمشر یو ځل بیا له افغانستانه ددغه هېواد ځواکونو د ایستلو پر پروسې سختې نیوکې کړې او ویلي یې دي که دی په واک وای، ښایي هیڅکله داسې څه نه وای شوې.
ډونالډ ټرمپ د ځواکونو دا ډول ایستل او د کابل په هوايي ډګر کې د ۱۳ امریکایي سرتېرو وژل کېدل د امریکا په تاریخ کې تر ټولو کمزوری او د نوموړي په ټکو شرموونکی کار بللی.
نوموړی وایي، که څه هم دی خپله هم د ځواکونو ایستلو پلوی و، خو غوښتل يې دا بهیر په ځواک او عزت ترسره او د بګرام هوايي اډه او پرمختللي پوځي تجهيزات یی په افغانستان کې نه وای پریښودلې
د امریکا ولسمشر ډونالډ ټرمپ وايي: «له افغانستان نه د امریکایي ځواکونه اېستل ما هم غوښتل، خو دغه کار مې په عزت او ځواک سره کاوه. امریکا باید د بګرام پوځي اډه نهوای پرېښې؛ ځکه دا یوه لویه پوځي اډه ده، چې سلګونه جریبه ځمکه یې لرله. امریکا ګڼ پوځي تجهیزات طالبانو ته پرېښودل او دا یوه وحشت ناکه پرېکړه وه. دا د شرم ځای دی، چې هر کال پر سړکونو د امریکا له پاتې شویو تجهیزاتو سره د طالبانو پرېډ ګورم.»
ډونالډ ټرمپ له تېر یو کال راهیسې په پرلپسې ډول په افغانستان کې د امریکایي تجهیزات پر پاتې کېدو، بګرام اډې او د ځواکونو پر ایستلو نیوکې او څرګندونې کوي.
ډونالډ ټرمپ په تېر کې ادعا کړې وه، چې له امريکا په افغانستان کې د ۸۵ میلیارد ډالرو په ارزښت پوځي تجهیزات شاته پاتې شوي دي.
د پوځي چارو څارونکي بیا وایي، ټرمپ غواړي د خبرو له لارې په سیمهییزو سیالانو فشار راوړي، خو په عمل کې هغه څه امکان نهلري چې امریکا یې هیله او تمه لري.
د پوځي چارو شنونکی توریالی ځاځی وايي: « زه ډاډ ورکوم امریکا په هېڅ صورت ونه کولای شول چې بیا پر افغانستان یرغل وکړي د دې لپاره چې اوس یو بل اقتصادي مخ دی غواړي په نړۍ کې یوه ټولنه د اقتصادي سیاست په نامه جوړه کړي.»
د پوځي چارو شنونکی اخترمحمد راسخ وايي: « د چین له پانګونې څخه مخنیوی وکړي نو بنا امریکا هېڅکله هم چینیایانو او روسنانو ته اجازه نه ورکوي چې افغانستان کې پر کانونو او زیرمو پانګونه وکړي.»
ټرمپ له افغانستانه د خپلو سرتېرو له وتلو راهیسې نږدې ۳۰ ځله ویلي، چې امریکا باید په افغانستان کې د بګرام پوځي اډه له لاسه نه وای ورکړې.
نږدې هر ځل چې هغه د کابل په شمال پروان ولایت کې د بګرام پوځي اډې یادونه کړې، سملاسي یې چین یاد کړی او ادعا یې کړې، چې بګرام يې اشغال کړی دی.
د سیاسي چارو شنونکي هم دې ټکي ته اشاره کوي او وايي، ډونالډ ټرمپ یوازې د چین لپاره بګرام پوځي اډه بیا بیا یادوي.
د سیاسي چارو شنونکی معین ګل څمکنی وايي: « باګرام اډه د چین لپاره غواړي د چین د تهدید لپاره یې غواړي، ټرمپ دا فکر لکه د ګرینلینډ، کاناډا، ایران او نورو هېوادونو لپاره یې لري افغانستان هم په دغه شکل سره تر فشار لاندې وساتي.
واک ته د ډونالډ ټرمپ له بیا راګرځېدو راهیسې هغه په ځلونو د امريکا په مخکيني ولسمشر جوبایډن سختې نیوکې کړې، له افغانستانه یې د ځواکونو پر ایستلو پروسې ملامت کړی او دا کړنه یې یوه لویه تېروتنه او شرم بللی دی.
