د خوست په مرکز کې د ځوانانو له خوا د شاعر او لیکوال، مطیع الله تراب په یاد د ۵۵ کلبونو ترمنځ د فوټبال سیالیو موخه، خوست کې د فوټبال ورزش پراختیا او د لوبغاړو مهارتونو ته وده ورکول او دغه راز، د هغو فرهنګي شخصیتونو یاد تازه کول ګڼل شوې چې د ټولنې په فکري ویښتیا او فرهنګي وده کې يې رول درلود.
د سیالیو تنظيموونکی ثاني ګل سخي وايي: « موږ بیا هم هڅه کوو هغه کسان چې د خپلې خاورې لپاره یې په هره برخه کې کار کړی وي، د هغوی په نوم او ویاړ سیالۍ جوړې کړو او نوم یې ژوندی وساتو.»
د خوست اوسېدونکی قدیرالله لکڼوال وايي: « دا لوبې او نوم د دې لپاره دی چې د تراب یاد تازه شي. خوستي ځوانان هڅه کوي نه یوازې فوټبال سیالۍ بلکې نورې سیالۍ هم د هغه په نوم جوړې کړي، ترڅو د ده نوم او شعر د خلکو په یاد کې پاتې شي.»
لوبغاړي په دې ولایت کې د فوټبال لوبې د ودې لپاره دا ډول سیالۍ مهمې ګڼي او ترڅنګ یې له اړوند ادارو غوښتنه کوي چې د فوټبال پراختیا لپاره دې د معیاري لوبغالو په جوړولو او د دوی په مسلکي روزنه کې هڅې لا زیاتې کړي.
د فوټبال لوبغاړی عبدالحی شاهد وايي: « له مرکزي فډراسیون څخه مې غوښتنه دا ده چې د خوست فوټبال ته ډېره توجه وکړي؛ ځکه دلته ښه لوبغاړي شته، خو ستونزه دا ده چې موږ معیاري لوبغالی او روزونکي نه لرو.»
د فوټبال لوبغاړی ګل کبیرجان وايي: « له مرکزي فډراسیون غواړو چې موږ ته تکړه ټرېنران او روزونکي را ولېږي او دلته موږ ته روزنیز کمپونه جوړ کړي.»
په ورته مهال، د فوټبال فډراسیون ځایي مسوولین په خوست کې د یادې لوبې معیار مخ پر ودې بولي او زیاتوي، د سیمهییزو سیالیو ډېرېدو او د لوبغاړو روزنې په برخه کې به د لا ډېرې پاملرنې ترڅنګ، عملا په کليوالي سیمو کې د معیاري لوبغالو جوړېدو ته هم پاملرنه ډېره کړي.
د خوست فوټبال فډراسیون رییس ریبار هڅاند وايي: « د مراتبو لړۍ هغه لوبې چې له فیفا څخه موږ ته راکول کېدې، موږ په پوره معیارونو سرته رسولې دي. همدا لامل دی چې د خوست فوټبال سطحه ورځ تر بلې د معیاري کېدو پر خوا روانه ده.»
د پښتو ادب د نوموتي شاعر او لیکوال، اروښاد مطیع الله تراب په یاد دا سیالۍ چې د خوست مرکز متون ښار اړوند د چیغۍ کلي ځوانانو له خوا شاوخوا درې میاشتې وړاندې پېل شوې وې، په پایلوبه کې یې د همدې کلي غورځنګ کلب د متون بابا کلب ته د یو صفر په توپیر ماتې ورکړه او اتلولي یې خپله کړه.
