پر وېنزویلا له برید وروسته د امريکا سترې محکمې نیکولاس مادورو او د هغه مېرمن د محاکمې لپاره ورغوښتي و. د راپورونو له مخې، نیکولاس مادورو په محکمه کې پر نوموړي ټول لګول شوي تورونه رد کړي دي.
ښاغلی مادورو د امريکا له لوري د نشهيي توکو په قاچاق، ترهګريزو کړنو، د وسلو او ویجاړوونکو چاودېدونکو توکو پر ساتنې تورن دی. راپورونه وايي، مادورو د نیویارک په محکمه کې ویلي چې هغه لا هم د وېنزوېلا برحاله ولسمشر دی.
د وېنزوېلا پرځول شوی ولسمشر نیکولاس مادورو ویلي: « زه بې ګناه یم، تورونه نه منم. هغوی بې له کومو ښکاره شواهدو راغلل او زه یې په خپل کور کې ونیولم. زه یو شریف سړی یم او د خپل هېواد ولسمشر یم. بیا بیا وایم زه یو بې ګناه او شریف سړی یم.»
د مادورو مېرمن سیلیا فلورېس چې له خپل خاوند سره يو ځای امريکايي ځواکونو نیولې، هم پر ځان لګېدلي تورونه رد کړي. د دوی د محاکمې پرمهال د ویډیو اخیستلو اجازه نه وه، خو یوازې محدود شمېر خبریالانو ته د محاکمې په غونډه ګې د ګډون اجازه ورکړل شوې وه.
بله خوا، د ملګرو ملتونو امنيت شورا په وېنزوېلا کې د رامنځته شوي وضعیت او د امریکا د بریدونو په اړه ځانګړې ناسته وربللې وه. دا ناسته چې د يادې شورا له لوري په ۲۰۲۶ زېږدیز کال لومړنۍ ناسته او ځانګړې وه، اجنډا یې نړیوال ثبات ته ورپېښ ګواښونه بلل شوي.
د ملګرو ملتونو سرمنشي په دې ناسته کې ګډون نه دی کړی، خو دې بېړنۍ ناستې ته يې مرستیالې روزمري ډيکارلو د نوموړي پیغام لوستی.
د ملګرو ملتونو عمومي منشي مرستیالې روزمري ډيکارلو ویلي: « د وېنزوېلا په اړه د متحده ایالاتو د کړنو په تړاو سخته اندېښنه لرم. په دې برخه کې د نړیوالو حقوقو اصولو ته درناوی نه دی شوی. زه د دې هېواد د احتمالي بېثباتۍ د زیاتېدو، پر سیمې د هغه د ممکنه اغېزو په اړه ژوره اندېښنه لرم. دا ښايي د هېوادونو ترمنځ د اړیکو د پرمخ په څرنګوالي کې ټکر رامنځته کړي.»
په ملګرو ملتونو کې د وېنزوېلا استازی وايي، هېواد يې پرته له کوم قانوني توجیه د غیرقانوني وسله وال برید هدف ګرځېدلی او امریکا یې د ملګرو ملتونو له منشور څخه په ښکاره سرغړونې تورنه کړې ده.
نوموړي ويلي، نه یوازې دا چې د هېواد حاکمیت یې په خطر کې دی بلکې د نړیوال قانون اعتبار او د ملګرو ملتونو واک هم په خطر کې دی.
په ملګرو ملتونو کې د وېنزوېلا استازی سامویل مونکاډا ویلي: « وېنزوېلا د جنورۍ په درېیمه نېټه د امریکا له خوا له غیرقانوني وسلهوال برید سره مخ شوه چې هېڅ قانوني توجیه یې نه لرله او د ملګرو ملتونو د منشور، د جینوا کنوانسیونونو او د حاکمیت د مساواتو له اصل څخه ښکاره سرغړونه وه.»
د ملګرو ملتونو دغې بېړنۍ ناستې کې د کولمبیا، روسیې او چین پر نیوکو سربېره هم د امریکا استازي خبرې وکړې او پر وېنزوېلا يې د بريد او د ولسمشر نيولو له اقدام کلکه دفاع وکړه.
بله خوا، د وېنزوېلا د پارلمان غړی او د پرځول شوي ولسمشر نیکولاس مادورو زوی نيکولاس ګویرا، د خپل مور او پلار له توقيف راهیسې په لومړي ځل خبرو کې د امریکا دا کړنه غندلې او د خپل مور او پلار د خوشي کېدو غوښتنه یې کړې.
نیکولاس ګویرا زیاته کړې: « که موږ د ولسمشر تښتونه عادي کړو، هېڅ هېواد به خوندي نه وي. نن وېنزوېلا ده، سبا بل هر هغه هېواد کېدی شي چې له تسلیمېدو انکار وکړي. دا سیمهيیزه ستونزه نه ده بلکې د نړۍ سیاسي ثبات ته مستقیم ګواښ دی.»
بله خوا، د نيکولاس مادورو مرستيالې دلسي رودرېګز د پلازمېنې کاراکاس د ملي شورا په غونډه کې د وېنزویلا د لنډمهالې ولسمشرې په توګه لوړه وکړه.
د دې هېواد د ملي شورا ریيس خورخه رودرېګز چې د لنډمهالې ولسمشرې ورور دی، نوموړې ته سوګند ورکړ.
رودرېګز په دې اړه جوړو شویو مراسمو کې ویلي، دا مراسم له هغه درد وروسته ترسره کوي چې هېوادوالو ته يې د یوه غیرقانوني نظامي تېری وروسته رسېدلی.
د وېنزوېلا لنډمهالې ولسمشرې دلسي دودرېګز ویلي: « نیکولاس مادورو او مېرمن سیلیا فلورېس دوه هغه اتلان دي چې وېنزوېلا به تل پرې ویاړي. تاسې پوهېږئ چې زموږ هېوادوال نن سبا له یوه درانه غم او درد سره مخ دي. زموږ پر هېواد یو غیرقانوني نظامي تېری شوی چې له امله یې موږ ټول دردمن یو.»
د وېنزوېلا ۵۶ کلنه لنډمهاله ولسمشره له امریکا سره برمته نیکولاس مادورو متحده ده او له ۲۰۱۸ کال راهیسې يې مرستیاله پاتې شوې. هغې مخکې د وېنزوېلا د اقتصاد او ماليې وزارتونه هم پرمخ وړي.
د فرانس پرېس خبري اژانس د معلوماتو له مخې، زرګونو وېنزوېلایانو د دوشنبې په ورځ په کاراکاس کې لاریون وکړ او امریکا ته د لېږدول شوي ولسمشر نیکولاس مادورو د خوشي کېدو غوښتنه یې وکړه.
لاريون کوونکي د وېنزوېلا د پارلمان مخې ته په داسې وخت کې راټول شوي وو چې د نيکولاس مادورو مرستیالې دلسي رودرېګز د لنډمهالې ولسمشرې په توګه لوړه کوله.
