د عامې روغتیا وزیر وایي، هند ورسره ژمنه کړې چې افغانستان ته د معیاري درملو پر صادرولو سربېره به د افغانستان د روغتیایي کارکوونکو ظرفیت په لوړولو کې هم همکاري وکړي.
مولوي نور جلال جلالي له یوې هندي رسنۍ سره خبرو کې منلې چې افغانستان ته له پاکستان بېکیفیته درمل واردېدل او له امله يې افغانان له ستونزو او کړاونو سره مخ وو.
د عامې روغتیا وزیر زیاته کړې: « د هند له روغتیا وزیر سره مې لېدنه او خبرې خورا ګټورې وې. له هغه سره مې د دواړو لورو ترمنځ د روغتیايي اړیکو پر پیاوړتیا، د روغتیايي کارکوونکو ترمنځ د تجربو پر تبادلې، د افغان روغتیايي کارکوونکو ظرفیت لوړونې ته د زمینې پر برابرولو او همدارنګه افغانستان ته د معیاري درملو د واردولو په اړه خبرې وشوې. په دې لیدنه کې د سرطان درملنې، افغان ناروغانو ته په هند کې د درملنې او د ويزې ورکولو په برخه کې د اسانتیاوو پر رامنځته کولو او د افغانستان روغتیايي مرکزونو ته د طبي تجهیزاتو پر برابرولو هم خبرې وکړې.»
په ورته مهال، ډاکټران د هندوستان د تازه ژمنو هرکلی کوي، خو غوښتنه لري چې له هند څخه د واردېدونکو درملو کيفيت باید په جدي توګه وڅېړل شي.
