په پاکستان کې د ګډوډيو په دوام، ناامني او سياسي بېثباتي په پرله پسې توګه په شدت سره د پراخېدو په حال کې دي، هغه چې عام پاکستانیان يې لومړۍ درجه مسوول د دې هېواد پوځ ګڼي.
د اسلاماباد د شخړو او امنيتي څېړنو مرکز په يوه تازه څېړنه کې موندلې چې د روان کال له جنوري تر نومبر پورې په دې هېواد کې ناامني ۲۵ سلنه زياته شوې.
په څېړنه کې د زياتو امنيتي پېښو امله خيبرپښتونخوا او بلوچستان ډېرې ناامنه سيمې ښودل شوي چې په کې ۳ زره۱۸۷ کسانو له وژل کېدو سره د ټولو وژل شویو۹۲ سلنه او د ۲زره نورو له ټپي کېدو سره د ټولو ټپيانو ۹۲ سلنه تشکیلوي.
د اسلاماباد د شخړو او امنیتي څېړنو مرکز موندنې ښيي: « له جنورۍ تر نومبر پورې په عمومي توګه د ترهګرۍ په کچه کې ۲۵سلنه زیاتوالی راغلی چې له امله یې ۳ زره ۱۸۷ کسان وژل شوي دي. په داسې حال کې چې په ۲۰۲۴ کال کې۲۵۴۶ کسان وژل شوي وو. دا شمېرې شاوخوا ۲۰ سلنه زیاتوالی ښیي.»
دا شمېرې وروسته له هغې خپرېږي چې د خيبرپښتونخوا اعلی وزير سهیل افریدي په يوه اعتراضيه غونډه کې پوځ د پښتنو د وينو پر تويولو تورن کړی او په خبره يې په همدې پلمه يې په پښتونخوا کې بريدونه او عمليات کړي.
شنونکي د پاکستان تر کنټرول لاندې سیمو کې د ناامنيو زياتېدو اصلي لامل په خپله د پاکستان هغه پالیسۍ بولي چې په خبره يې، په سيمه کې یې د ترهګرۍ د ترويج لپاره طرحه کړې دي.
د نړیوالو اړیکو شنونکی سمیر انګار وايي: « باید په پاکستان کې ټولپوښتنه ترسره شي او پر بنسټ یې د خلکو مشروع حکومت رامنځته شي؛ ترڅو هغه اقتصادي، سیاسي او ټولنیز مشکلات چې اوسمهال شته دي، حل شي.»
د پوځي چارو شنونکی توریالی ځاځی وایي: « په پښتونخوا او بلوچستان کې وژنې د پاکستان پوځ او استخبارات کوي. نړۍ په دې اړه چوپه خوله ده او دا ستر جنایت دی.»
ځینې نور شنونکي د ناامنيو زياتېدو له امله د پاکستان پوځي رژیم له ګڼو ننګونو سره مخ ګڼي او باور لري چې که خپلو نیمګړتیاوو ته پاملرنه ونه کړي، نو د نظام پايښت يې له خطر سره مخ کېدونکی دی.
د سیاسي چارو شنونکی ادریس محمدي ځاځی وايي: « یوه ستره ستونزه دا ده چې هلته د ملکي وګړو د مرګ ژوبلې ګراف ډېر لوړ دی، ترڅنګ یې د ملت او د حکومت ترمنځ د نفاق کچه له اندازې لوړه شوې. د پاکستان د ریاست ټوله توجه او پاملرنه له افغانستان سره د اړیکو خرابولو خواته ده او د همدې لپاره وخت نا وخت پر فرضي کرښه تاوتریخوالي ته لمن وهي. پاکستان باید په خپلو داخلي او بهرنیو پالیسیو له سره غور وکړي.»
په پاکستان او د دې هېواد تر کنټرول لاندې سيمو کې په۲۰۲۴ کال هم ټول۲۵۴۶ کسان چې ډېری يې پاکستاني پوځيان وو، وژل شوي او ۱۹۸۱ نور ټپیان شوي وو.
