د اولمپیک ملي کمېټې چارواکو د رستمي غېږنیونې او وزن پورته کولو د هغو لوبغاړو هرکلی وکړ چې په دې وروستیو کې یې متحده عربي اماراتو او ایران کې لوبې ګټلې وې.
د بدني روزنې فډراسيون رییس وایي، اسلامي امارت هڅه کوي چې د ټولو ملي لوبغاړو کلک ملاتړ وکړي، ترڅو په نړیواله کچه د پام وړ نورې لاسته راوړنې هم ولري. احمدالله وثیق د افغان لوبغاړو اوسنۍ لاسته راوړنې د افغانستان په تاریخ کې بې ساري بولي.
د افغانستان د بدني روزنې فډراسيون عمومي رییس احمدالله وثیق وايي: « دا لاسته راوړنې د افغانستان د ورزش په تاریخ کې کمسارې دي، داسې چې له دې وړاندې د ورزش برخې دا ډول لاسته راوړنې نه لرلې. دا د دې ښکاروندويي کوي چې د ورزش اداره او د افغانستان اسلامي امارت د ورزشکارانو تر شا ولاړ دي، ملاتړ یې کوي او شته امکانات په واک کې ورکوي.»
تېره اوونۍ په متحده عربي اماراتو کې د افغانستان په ګډون د ۳۵ هېوادونو لوبغاړود غېږنیونې سیالیو کې برخه اخیستې وه چې افغان لوبغاړو په کې ښې لاسته راوړنې لرلې.
په همدې حال کې، د وزن پورته کولو په سیالیو کې چې په ایران کې جوړې شوې وې افغان لوبغاړي فضل کریم ترکمن درېیم مقام خپل کړ.
لوبغاړي په دغو سیالیو کې خپل ګډون مهم بولي او وايي، هڅه کوي لا ډېرې لاسته راوړنې ولري. دوی له حکومت هم غواړي چې په بشپړ ملاتړ سره يې ستونزې ور حل کړي.
د غېږنیونې لوبغاړی ملا ميرويس شېربادغیس وايي: « له حکومت مې غوښتنه دا ده چې ورزشکارانو ته لا ډېره پاملرنه وکړي، ځکه چې ورزشکاران خپل هېواد ته ویاړونه راوړي.»
پهلوان فضل کریم ترکمن وايي: « له حکومت مې غوښتنه دا ده چې په ورزش بوختو لوبغاړو او پهلوانانو ملاتړ وکړي، دوی ته ښه کلبونه جوړ کړي او ویې هڅوي؛ ترڅو دوی هېواد ته د اتلولۍ مډالونه راوړي.»
روزونکي هم له حکومت غواړي چې په بېلابېلو برخو کې دې د لوبغاړو کلک ملاتړ وکړي او په خبره يې، تر ټولو مهمه يې دا ده چې د ستونزو پر وخت دې يې لاس نيوی وکړي.
روزنکی ميرعبدالغفور رسولي وايي: « زموږ د مثبت ۱۱۰ کیلو وزن پورته کوونکي لوبغاړي وکولی شول د برونزو ۳ مډالونه وګټي. دا مډالونه نه یوازې زموږ د فډراسیون بلکې د ټول افغان ملت لپاره لویه لاسته راوړنه ده.»
روزنکی حکمت الله حکیمي وايي: « له حکومت او د اولمپیک له ملي کمېټې څخه غوښتنه دا ده چې د بهرنیو سفرونو پرمهال د ورزشکارانو لګښتونه برابر کړي. زه ډاډ ورکوم چې زموږ لوبغاړي او پهلوانان چې هر هېواد ته لاړ شي، له مډال پرته نه راځي.»
په وروستیو درېيو کالو کې افغان لوبغاړي په بېلابېلو برخو کې د پام وړلاسته راوړنې لري چې د افغانستان له ۱۷ کالو کمعمره ځوانانو د فوټسال ملي لوبډلې له خوا د اسیايي سیالیو اتلولي ګټل یې غوره بېلګه ده.
