د سعودي عربستان په کوربه توب د اسلامي هېوادونو پیوستون په نامه جوړو شویو سیالیو کې د ګډون کوونکو افغان لوبغاړو وروستۍ ډله هم هېواد ته راستنه شوه.
د المپیک ملي کمېټې چارواکو او یوشمیر مینه والو د کابل په نړیوال هوايي ډګر کې د افغان لوبغاړو د دې درې کسیزې ډلې چې د ووشو په رزمي سیالیو کې یې د افغانستان استازیتوب کاوه، تود هرکلی وکړ.
دغو لوبغاړو د ووشو رزمي سیالیو په درېیو جلا وزني کټه ګوریو کې برخه اخیستې وه چې له ډلې یې محمد جعفر سلطاني د برنزو مډال ګټونکی شو.
محمد جعفر سلطاني د کابل نړیوال هوايي ډګر کې خبریالانو ته د خپلو سیالیو په اړه وویل: « له نېکه مرغه بریالی شوم چې خپل هېواد ته د برونزو مډال ترلاسه کړم. د لوبو سطحه ډېره لوړه وه او د ټولې اسلامي نړۍ لوبغاړي په کې وو. له نېکه مرغه موږ هم وکولی شول چې له دې لوبو خپله ونډه ترلاسه کړو.»
اسدالله احسان د ووشو په رزمي سیالیو کې ګډون کوونکی بل افغان لوبغاړی و چې د ۸۵ کیلوګرامه وزن په سیالۍ کې د خپل قزاقستاني سیال له لوري په لومړي پړاو کې له ماتې سره مخامخ شو. هغه وویل، په راتلونکي کې به هڅه وکړي چې د خپل هېواد لپاره اتلولي وګټې.
د ووشو ملي لوبغاړی اسدالله احسان وايي: « زما خپل، د خلکو او استادانو انتظار ډېر پورته وو، خو متأسفانه زه د نړۍ له اتل هېواد قزاقستان سره برابر شوم، که څه هم ما ښه لوبه وکړه، خو نتیجه د هغوی په ګټه شوه. زه به دا ماتې راتلونکي کې جبران کړم. یوه میاشت وروسته ازبېکستان کې لوبې دي او هڅه به وکړم چې دغه ماتې جبران کړم.»
د المپیک ملي کمېټې چارواکي لوبغاړو ته د ښه راغلاست او بریالي سفر د مبارکۍ ترڅنګ، په هر حالت کې د دوی ملاتړ او ورته د اسانتیاوو برابرولو ډاډ ورکوي.
د المپیک ملي کمېټې رییس احمدالله وثیق وايي: « زه ټولو ورزشکارانو او لوبغاړو ته ډاډ ورکوم چې د هېواد د ورزش اداره ستاسو تر شا ولاړه ده او هر هغه امکانات به ستاسو په واک کې درکړو چې له موږ سره شته دي. موږ به کوشش کوو چې سږ کال ګټلي مډالونه وساتو. موږ به هڅه کوو چې زموږ مډال راوړونکي راتلونکو لوبو کې نور هم په ښه کیفیت لوبې وکړي او له دې زیات مډالونه ترلاسه کړي.»
د کورنیو چارو وزارت ویاند عبدالمتین قانع وايي: « اسلامي امارت له ورزش کارانو د ملاتړ پالیسي لري او هڅه کوي چې لازمې اسانتیاوې ورته برابرې کړي. تاسو وینئ چې د افغانستان بدني روزنې او اولمپیک ادارې په دې وروستیو کې ښې لاسته راوړنې لري؛ لامل یې دا دی چې ښه شفقت او مدیریت کېږي او د مشرتابه تر توجه لاندې دي.»
د اسلامي پیوستون په سیاليو کې چې د سعودي عربستان په پلازمېنه ریاض کې د روانې نومبر میاشتې له ۷مې تر ۲۱مې نېټې ترسره شوې؛ د ۵۷ هېوادونو شاوخوا ۳۵۰۰ تنو لوبغاړو برخه اخیستې وه.
له افغانستان څخه ۵۷ ورزشکارانو په ۱۳ بېلابېلو ورزشي څانګو کې برخه اخیستې وه چې د سرو زرو، سپینو زرو او برونزو درې مډالونو په ګټلو سره یې د مډالونو په جدول کې ۲۶م مقام خپل کړ.
