له ۱۷کالو کمعمره فوټبال ملي لوبډله د اسیا جام مقدماتي سیالیو کې د ګډون په موخه میانمار ته لاړه.
د افغانستان فوټبال فډراسیون مسوولین وایي، لوبغاړو په بشپړ ډول یادو سیالیو ته چمتوالی نیولی او په خبره یې، ډک لاسونه به هېواد ته راستنېږي.
د فوټبال فډراسیون رییس محمد یوسف کارګر وايي: « دغو سیالو ته یو ښه چمتو شوی ټیم لرو. دا لوبې د اسیايي هېوادونو د ځوانانو ترمنځ دي او موږ د عمان، سوریې، میانمار او نیپال له ټیمونو سره مخامخ یو.»
د فوټبال فډراسیون مرستیال احمد جان ځدراڼ وايي: « همدا تاسو[لوبغاړي] یاست چې د افغانستان لپاره به ویاړونه راوړئ، موږ تمه لرو چې تاسو به هم د نورو لوبډلو په څېر ډک لاسونه هېواد ته راستانه شئ.»
د المپیک ملي کمیټې چارواکي بیا ډاډ ورکوي چې د تېر په څېر به په بېلابېلو برخو کې د لوبغاړو ملاتړ کوي. د دې کمېټې مشر احمدالله وثیق وایي، لوبغاړي د افغانستان اوسني وضیعت په اړه نړۍ ته ښه انځور وړاندې کولی شي.
د المپیک ملي کمیټې رییس احمدالله وثیق زیاتوي: « زموږ د بدني روزنې عمومي ریاست او فوټبال فډراسیون په ګډه ستاسو ملاتړ کوو. همدارنګه د افغانستان ټول ولس تاسو ته سترګې په لار دی چې په لوړ مورال او پوره همغږۍ لاړ شئ او افغانستان ته ویاړ راوړئ.»
بله خوا، د افغان لوبډلې روزونکي یادو سیالیو ته د خپلې بشپړې تیارۍ ډاډ ورکوي، خو ترڅنګ یې له خلکو د لوبغاړو د ملاتړ او لاسنیوي غوښتنه کوي.
له ۱۷کلونو کمعمره فوټبال ملي لوبډلې مشر روزونکی وايي: « په دې ټیم کې د افغانستان تر ټولو غوره لوبغاړي راټول شوي، اړین تمرینونه ورکړل شوي او تمه لرو چې د سیالیو بل پړاو ته لاره پيدا کړو.»
له ۱۷کلونو کمعمره فوټبال ملي لوبډلې مرستیال روزونکی وايي: « موږ ژمنه کوو چې د افغانستان ښه استازیتوب وکړو. هلته موږ د کابل، کندهار او هرات په نومونو نه پېژني بلکې ټول د افغانستان په نامه یادېږو. زموږ لیدلوری دا دی چې د افغانستان په نوم قهرباني وګټو.»
له ۱۷ کلونو کمعمره فوټبال ملي لوبغاړي هم وایي، له تېرو درېیو میاشتو راهیسې یې د فوټبال فډارسیون له لوري د چمتوالي کمپونه بشپړ کړي. لوبغاړي وروستیو کې د خلکو له لوري په لوړه کچه له ۱۷کلونو کمعمره فوټسال لوبډلې د اتلولۍ هڅونه او ملاتړ بې مخینې یادوي او په خبره یې، د لوړې کچې دې ملاتړ دوی ته هم د ځانګړې ملي جذبې حس ورکړی.
د ځوانانو فوټبال لوبډلې یو تن لوبغاړی وايي: « درې میاشتې کېږي چې د دې سیالیو لپاره مو تمرینونه لیدلي او له ملت سره ژمنه کوو چې بل پړاو ته به ورځو.»
د دې لوبډلې یو بل لوبغاړی وايي: « موږ دغو لوبو ته بشپړ چمتوالی لرو او که خدای کول، خپل خلک به نه ناهیلي کوو.»
یو بل لوبغاړی وايي: « د فوټسال لوبډلې پراخ هرکلي موږ ته ډېره انګیزه راکړه او موږ هم له خپلې خوا هڅه کوو چې موږ هم افغانستان ته قهرماني راوړو.»
افغان لوبډله د اسیايي جام مقدماتي سیالیو کې له میانمار، سوریې، نیپال اوعمان سره په جي ګروپ کې یو ځای سیالۍ لري چې لومړۍ لوبه به ۱۲ورځې وروسته له کوربه میانمار سره د دې هېواد په یانګون لوبغالې کې ترسره کړي.
