هرات ته د فوټسال تر۱۷ کالو کم عمره ملي لوبډلې د لوبغاړو سفر د دې ولایت د خلکو له تود هرکلي سره مخ شو.
د هرات اوسېدونکي وایي، د ورزشي فعالیتونو دوام نه یوازې د ځوانانو خپل استعدادونه پیاوړي کوي بلکې ټولنه کې د یووالي او خوښۍ فضا پراخوي.
د هرات اوسېدونکی خیال محمد وايي: « نن داسې یوه ورځ ده چې زموږ د هېواد ټول قومونه په یوه ځای سره راټول شوي او د ځوانانو د بریا نمانځنه کوي. زه د خپلو خلکو له یوالي او وحدت ډېر خوشاله یم.»
د هرات اوسېدونکی اکبر حسین وايي: « له خلکو مننه چې دلته راغلي او خپل اتلان تشويقوي. په یوالي کې مو بریا او دیانت دی.»
د هرات اوسېدونکی عصمت الله وايي: « زه له سوادګرو هم مننه کوم چې زموږ لوبغاړي یې تشویق کړل. باید د هر ورزش لوبغاړي وهڅول شي.»
په ورته مهال، د فوټسال ۱۷ کالو کم عمره ملي لوبډلې لوبغاړي وایي، د خلکو تود هرکلي دوی ته د قوي روحیې، باور او مثبتې انرژۍ احساس ورکړی او دغه هرکلی به يې پر راتلونکو لوبو مثبت اغېز ولري.
ملي لوبغاړی عباس حیدري وايي: « زموږ ډېر فوق العاده هرکلی وشو، د هرات له خلکو ډېره مننه کوم. دا ډول هرکلی زموږ لپاره ستر ویاړ دی.»
ملي لوبغاړی علي احمدي وايي: « زموږ ډېر تود هرکلی وشو، دا موږ ته انګیزه راکوي. موږ د همدې هرکلي لپاره مباره وکړه او اتلولي مو ترلاسه کړه.»
بله خوا، د هېواد د فوټبال فډراسیون مسوولین وایي، د ورزش د پراختیا لپاره د خصوصي سکټور ونډه مهمه ده.
د افغانستان فوټبال فډراسیون رییس محمد یوسف کارګر وايي: « موږ هغه مهال د نړۍ په کچه لویې لاسته راوړنې درلودلی شو چې خصوصي سکټور له سپورټي ادارو سره په ګډه د ورزشکارانو ملاتړ او لاسنیوی وکړي.»
د افغانستان ۱۷ کالو کم عمره فوټسال ملي لوبډلې تېره میاشت ایران ته دوه د یو پر وړاندې ماتې ورکولو سره، د ځوانانو اسیایي سیالیو کې لومړی مقام خپل کړ.
