کرزی زنداني په خوست کې د ازادو سیالیو لوبو کې ځانګړی نوم لري، خو غریبۍ او د کور سرپرستۍ پر دې نوم داسې سیوری غوړولی چې ټوله ورځ د لوبو او سیالیو په ځای، د نورو بوټان پالش کوي او کورنۍ ته له دې لارې نفقه برابروي.
که څه هم کرزي همت نه بایللی او خپلو سیالیو ته یې هم دوام ورکړی، خو وايي، که يې لاسنیوی وشي کولی شي په دې بخه کې ځانګړې لاسته راوړنې ولري.
د ازادو سیالیو لوبغاړی کرزی زنداني وايي: « زه ډېرې اقتصادي ستونزې لرم، د کور کرایه، خواړه، روغتیايي لګښتونه او هرڅه زما په سر دي او زه یې لاندې کړی یم. ما خپل همت له لاسه نه دی ورکړی، د کور د سرپرستۍ ترڅنګ سپورټ هم کوم.»
نوموړي په ډېرو سیالیو کې برخه اخیستې او څو ځله یې د زون او ولایت په کچه مډالونه هم ګټلي دي.
روزونکی يې وایي، که ملاتړ یې وشي کولی شي د نړۍ په کچه هم د هېواد نوم وځلوي.
د ازادو سیالیو لوبغاړی کرزی زنداني وايي: « زه درې مسابقې لرم او تراوسه مې ماتې نه ده خوړلې او دا کمربند مې په خپل نوم دي. زه غواړم د نړۍ په کچه قهرمان شم او افغانستان ته ویاړونه راوړم.»
د ازادو سیالیو استاد رحمت الله اخلاص وايي: « کرزی ډېر استعداد لري، دی دوه دورې تمرین ته راځي او په خپل وزن کې تر ټولو غوره اتل دی. سره له دې چې بېوزله دی، خو بیا هم تمرین کوي.»
اخوا د ورزش ځایي مسوولین ډاډ ورکوي چې دوی په دې ولایت کې د ټولو برخو لوبغاړو ته پر وخت د امکاناتو برابرېدو زمینه برابره کړې او هڅه یې کړې چې د حکومتي ادارو د لاسنیوي ور هاخوا، ورزشي فعالیتونو ته د سوداګرو پام هم ور واړوي.
د خوست اولمپیک آمر عطاءالله کډوال وايي: « زموږ کوښښ دا دی چې د ورزشکارانو ستونزې له مرکزي ادارې او تجارانو سره شریکې کړو. همدارنګه دلته د ورزشکارانو ښې اتحادیې دي، له دوی ټولو سره مو شریکې کړې دي.»
خوست او ښایي هېواد کې ګڼ شمېر داسې ورزشکاران وي چې له سختو اقتصادي ننګونو سره مخ دي، خو د ډېرو په باور که هڅې دوام ومومي او د ورته استعدادونو ملاتړ وشي، نو ډېر دا ډول ځوانان کولی شي د هېواد نوم په نړیواله کچه وځلوي.
