په دې وروستيو کې وېنزوېلا ته څېرمه په کارایب سمندر کې د نشه يي توکو له قاچاق سره د مبارزې په اړه د امريکا هڅو، د دواړو هېوادونو ترمنځ فضا کړکېچنه کړې او ان يوه بل ته يې د جګړې خبرداري هم ورکړي.
د وېنزوېلا ولسمشر امریکا ته خبرداری ورکړی چې که امريکا يې د هېواد پر وړاندې کوچنی اقدام هم وکړي، نو په داسې يوه اوږده جګړه کې به يې ښکېله کړي لکه په افغانستان کې يې چې تجربه کړه.
نېکولاس مادورو دغه څرګندونې د امریکا سياېناېن ټلوېزيون ته کړې. نوموړي جګړې ته له تګ وړاندې له امريکا سره له سوله ييزو لارو د اړيکو پر رغولو ټينګار کړی.
د وېنزوېلا ولسمشر نیکولاس مادورو دغه راز ویلي: « نور نه اوږدمهاله جګړې، نه ناعادلانه جګړې، نه لېبيا، نه افغانستان، ژوندۍ دې وي سوله!»
د امريکا ولسمشر وار له مخې له وېنزوېلا سره مستقيمه جګړه رد کړې، خو د دې هېواد د جنګ وزير د مادورو څرګندونو ته په غبرګون کې ويلي، هغه سيمې به د نشهيي توکو له قاچاق او توليد پاکې کړي چې عام امريکايان يې قرباني دي.
د امريکا جنګ وزير پيټ هېګسټ ویلي: « ولسمشر ټرمپ امر کوي او جنګ وزارت يې عملي کوي! د سويلي برخې له عملياتو موخه د نشهيي توکو له ترهګرو د هېواد ساتنه او د امريکا له نيمې کرې د نشهيي توکو له منځه وړل دي. لويديځه نيمه کره زموږ ګاونډ دی او موږ به يې خوندي کړو.«
د امريکا په مشرۍ د ناټو غړيو هېوادونو پوځي ایتلاف په ۲۰۰۱ کال کې خپل ځواکونه افغانستان ته واستول. د لوېديځ زبرځواک هېوادونو دې ایتلاف په ۲۰۲۱ زېږدیز کال کې خپل شل کلن حضور له اسلامي امارت سره د دوحې هوکړې له مخې په افغانستان کې پای ته ورساوه.
کارپوهان په افغانستان کې د امريکا د دوو لسيزو اوږد حضور په اړه داسې نظر لري.
د سياسي چارو شنونکی محمد زلمی افغانيار وايي: « هر هغه اشغال چې د زور پر بنسټ وي، یوه ورځ پای ته رسېږي. اوس دا د نړیوالې ټولنې مکلفیت دی چې له امریکا او ناټو پوښتنه وکړي چې افغانستان کې یې شل کاله حضور د څه لپاره و؟»
د امريکايي براون پوهنتون د موندنو پر بنسټ، د ناټو په ایتلاف کې يوازې امريکا په افغانستان کې د شل کلن حضور پرمهال نږدې ۳ زره بشري ځواک بايللی او څه باندې ۲ ټرېلیون ډالره لګښتونه پرې راغلي.
