د کيک بوکسېنګ ملي فډراسیون له لوري د دې ورزشي برخې ملي لوبډلې لپاره د یوولسم پړاو غوراوي سیالیو پيلولو مراسم ترسره شول.
مسوولین وایي، په دې پړاو سیالیو کې شاوخوا۱۸۰ لوبغاړو له فراه، هرات، هلمند، کاپیسا، پنجشیر، کندز، بلخ، کابل او یو شمېر نورو ولایتونو ګډون کړی و چې موخه يې د لوبغاړو هڅونه او د ملي لوبډلې لپاره د غوره لوبغاړو غوراوی دی.
د کېک بوکسېنګ ملي فډراسیون تخنیکي مرستیال خواجه فدا محمد صدیقي وايي: « په دې لوبو کې د هېواد له ۳۰ ولایتونو څخه ۱۵۰ تنو لوبغاړو ګډون کړی، همدارنګه ۳۰ لوبغاړي هم د مرکز کابل دي چې ټولټال ۱۸۰ تنه کېږي او له دوی به ملي ټیم ته لوبغاړي غوره شي.»
ځينې نور مسوولین د تېرو کلونو په پرتله د غوراوي په دې سیالۍ کې د ګډون کوونکو شمېر زيات ښيي او ډاډ ورکوي چې ټول ګډونوال لوبغاړي په دې پړاو سیالیو کې د لوبېدو لپاره بشپړ چمتووالی لري.
دوی زیاتوي، د کېک بوکسېنګ ملي فډراسیون ونډه د نورو ورزشي څانګو په پرتله په نړیوالو سیالیو کې کمه ده او له حکومت غوښتنه کوي چې د دې ورزشي برخې لپاره د نړیوالو سیالیو د ترسره کولو زمینه هم برابره کړي.
د کېک بوکسېنګ ملي فډراسیون د شمال ختیځ زون مسوول نصیر احمد عاطف وایي: « د کېک بوکسېنګ فډراسیون رهبرۍ څانګه کې مو یو کمیسیون جوړ کړ چې په کې ولایتونو غړي شامل دي. موږ به په دې دوره کې وکولی شو چې له ولایتونو څخه هم لوبغاړي وټاکو، ترڅو حق حقدار ته ورسېږي.»
د کېک بوکسېنګ ملي فډراسیون د څارنې کمېټې مسوول بریالی رحیمي وايي: « ډېر هېوادونو د دې څانګې لپاره موږ ته بلنه نه ده راکړې، حال دا چې موږ په دې څانګه کې د سروزو مډالونه ګټلي او ښه قهرمانان لرو.»
له دې سره د سياليو ګډونوال لوبغاړي په دې پړاو سياليو کې د چمتووالي د ډاډ ورکولو ترڅنګ له حکومت د لا زيات ملاتړ غوښتنه کوي.
د کېک بوکسېنګ لوبغاړی یاسر یورش وايي: « مسابقې په ډېره ښه توګه مخکې ځي او په لوړه کچه ترسره کېږي. موږ د دې مسابقو له ترسراوي ډېر خوښ یو.»
لوبغاړی خیرالله وايي: « زه له دولت غوښتنه لرم چې موږ ته د دې زمینه برابره کړي چې د نړۍ په کچه لوبې وکړو او هېواد ته ویاړونه راوړو.»
د یادولو وړ ده چې د دې کنفرانس پرمهال د المپیک ملي کمېټې د بدني روزنې او سپورټ عمومي ریاست چارواکو ټینګار وکړ چې د لوبو په ټولو برخو کې به له لوبغاړو بشپړ ملاتړ کوي.
