ځينو ايراني رسنیو ويلي، په کابل کې د ايران شارژدافېر د خپل هېواد د سړکونو او ښاري پراختیا له مرستیال سره د افغانستان، ایران او چین ترمنځ د ګډې رېل پټلۍ پر اقتصادي ګټو خبرې کړې.
د ایران د سړکونو او ښاري پراختیا وزارت مرستیال وايي، د تلې په میاشت کې د ایران- افغانستان رېل پټلۍ له لارې ۶۳ زره ټنه صادرات او واردات ترسره شوي.
د نوموړي په خبره، دا پروژه د اقتصاد اړیکو پر پراختیا سربېره د سیمهییز ټرانسپورټ او سوداګرۍ حجم لوړولو لپاره هم اغېزناکه ده.
د ایران د سړکونو او ښاري پراختيا وزارت مرستیال جبارعلي ذاکري وايي: « دا پروژه د اقتصادي اړیکو پیاوړتیا، سیمهییزې پراختیا، له نړیوالو رېل پټليو سره پیوستون او دغه راز سوداګریزو توکو او مسافرو په لېږد کې اسانتیاوې رامنځته کوي.»
نوموړي دا هم ويلي، د افغانستان او ايران اورګاډي پټلۍ شبکې په پراخولو سره هڅه کوي چې په راتلونکي کې د يادې پټلۍ له لارې د دواړو هېوادونو د انتقالاتو کچه ۱۰۰ ټنو ته لوړه کړي.
د ايران او افغانستان ترمنځ د اورګاډي پټلۍ پر انتقالاتو سربېره د مسافرو تګ راتګ مهمه لار هم ګڼل کېږي. شنونکي دې ته په پام چې افغانستان په وچه کې ايسار هېواد دی، له هېوادونو سره يې د اورګاډي پټليو په وسيله نښلېدل مهم بولي.
د اقتصادي چارو شنونکی عبدالنصیر رښتیا وايي: « تاسو پوهېږئ چې افغانستان په وچه پورې تړلی هېواد دی، نړیوالو اوبو ته لاسرسی نه لري او ځینې وختونه له خپلو یو شمېر ګاونډیانو سره سرحدي او ټرانزیټي ستونزې لري، نو هرڅومره چې موږ ډېرې بدیلي لارې ولرو، همدومره ډېر کولی شو د سوداګرۍ په برخه کې د پام وړ پرمختګونه ولرو.»
د اقتصادي چارو شنونکی نورالله عزیز وايي: « هره نوې لارې چې کولی شي افغانستان له ګاونډيو هېوادونو او نړۍ سره ونښلوي، د افغانستان په ګټه ده. له ایران سره د اورګاډي پټلۍ نوی خط به نه یوازې د افغانستان او ایران ترمنځ تجارت پیاوړی کړي بلکې دواړو هېوادونو ته به د دې فرصت ورکړي چې نورو هېوادونو ته هم لاسرسی پیدا کړي.»
له دې وړاندې د ایران د بهرنیو چارو وزارت د حقوقي او نړیوالو چارو مرستیال کاظم غریب آبادي هم د اکټوبر په ۲۶ په کابل کې له حکومتي چارواکو سره د اړیکو پر پیاوړتیا سربېره، د دواړو هېوادونو ترمنځ د ګډې سوداګرۍ او ټرانزیټ پراختيا لپاره پر سیمهییز اتصال خبرې کړې وې.
