د ننګرهار وادي کرنیز دولتي شرکت مسوولین وايي، د اټکل له مخې به سږ کال د دې شرکت اړوند زیتونو له باغونو څخه ۱۶ سوه ټنه زیتون راټول شي چې له ۶۰ ټنو به یې اچار او له پاتې نورو تېل تولید شي.
د مسوولینو په خبره، سږ کال د زیتونو د اچارو په اندازه کې ۳۰ ټنه او د تېلو د تولید په اندازه کې ۴۰ سلنه زیاتوالی راغلی.
د ننګرهار وادي کرنیز شرکت اجراییوي رییس سید محمد نعیم محمدي وايي: « تېر کال زموږ د زیتون تېلو تولیدات ۱۳۵ زره ۵۰۰ لېټره او د زیتون اچار تولید ۳۰ ټنه وو. سږ کال به له پلان سره سم ۴۰ سلنه د تېلو تولید او ۳۰ ټنه به د چارو تولید زیاتېږي.»
د زیتونو پروسېس په کارخونه کې په کار بوخت کارګران وايي، د زیتونو حاصلاتو او تولیداتو زیاتوالي ته په کتو باید د زیتون باغونو له پراختیا سربېره له بهرنیو هېوادونو پر واردېدونکو زیتونو او تېلو تعرفه لوړه شي، ترڅو د دوی بازار لار نور هم ښه شي.
کارګر منور شاه وايي: « سږ کال زموږ زیتون په ښه بیه خرڅ شول او نور به هم زیات شي. که څه هم بهرني زیتون او تېل ارزانه دي، خو کیفیت یې ښه نه دی.»
کارګر باغچه ګل وايي: « موږ له دولت غوښتنه کوو چې د زیتون بهرني تېل منع یا هم ټکس پرې لوړ کړي، ځکه زموږ تېل د نړۍ په کچه لوړ معیار لري او بهرني تېل زموږ بازار خرابوي.»
د یاد شرکت مسوولین بیا وايي چې د بازار موندنې د زیاتوالي په موخه هڅې پیل شې دي، ترڅو د هېواد په ټولو ولایتونو کې د خرڅلاو څانګې پرانیزي. د دوی په خبره، له ماليې وزارت او اړوندو نورو ارګانونو سره یې خبرې کړې، ترڅو له بهرنیو هېوادونو څخه پر واردېدونکو زیتونو او تېلو تعرفه لوړه کړي.
د ننګرهار وادي کرنیز شرکت اجراییوي رییس سید محمد نعیم محمدي په دې اړه وايي: « په پلان کې ده چې ټولو ولایتونو کې نمایندګۍ جوړې کړو او خلکو ته تېل ورسوو. مالیې وزارت ته مو هم مکتوب استولی دی چې پر بهرنیو زیتونو د تعرفې لوړولو کې له موږ سره مرسته وکړي، ترڅو خلک زموږ خپل تېل وکاروي.»
د ننګرهار وادي کرنیز شرکت مسوولینو د معلوماتو له مخې، د زیتونو باغونو د پراختیا او حاصلاتو زیاتوالي په موخه سږ کال پلان لري چې د زیتونو ۵۰ زره نوي نیالګي کېنوي چې ورسره به د زیتونو په حاصلاتو او همدارنګه محصولاتو کې نور زیاتوالی هم راشي.
