د ریاست الوزرا اقتصادي مرستیال هرات کې د اوسپنې وېلې کولو کارخونې دویم فاز پرانیست. ملا برادر د پرانستنې په دې مراسمو کې د صنعتکارانو او پانګوالو د ملاتړ ډاډ ورکړ.
د ریاست الوزرا اقتصادي مرستیال زیاته کړه، اوسمهال په کور دننه تر بل هر وخت د پانګونې زمینه برابره شوې او له پانګوالو غواړي چې په کور دننه پانګونه وکړي او دوی یې د ستونزو حل ته ژمن دي.
د ریاست الوزرا اقتصادي مرستیال ملا عبدالغني برادر وايي: « هرڅوک چې په هره برخه کې پانګونه کوي، موږ د کار زمینه ورته برابروو؛ ملاتړ یې کوو او ستونزو ته یې رسېدنه کوو.
بله خوا، د کار خونې مسوولان وایي، د یادې کارخونې دویم فاز کې یې ۲۲ میلیون ډالره پانګونه کړې او له دې سره به یې د ګول سیخ د ورځني تولید کچه څه باندي۷۰۰ ټنو ته لوړه شي.
د اوسپنې ویلي کولو کارخونې رییس عطالله وردک وايي: « موږ دا مهال له ۷۰۰ تر ۷۵۰ تنو ته د کار زمینه برابره کړي او هره ورځ شاوخوا ۶ تر ۷ سوه ټنو ګول سیخونه په نړیوال ستندرد تولید لرو.»
د اوسپنې وېلې کلوو په دې کارخونه کې شاوخوا ۷۵۰ کسانو ته د کار زمینه هم برابره شوې.
دلته په کار بوخت کسان وایي، خوښ دي چې په کور دننه ورته د کار زمینه برابره شوې او له نورو پانګوالو هم غواړي چې د بهرنیو هېوادونو په ځای خپل هېواد کې پانګونه وکړي.
د کارخونې کارګر الله یار وايي: « غوښتنه کوم چې ټول پانګوال، تجاران او شتمن کسان کارخونې جوړې کړي او خلکو ته د کار زمینه برابره کړي. نو له مهاجرت ستړي شوي یو، که دلته کار وي هېڅ ځای ته نه ځو.»
کارګر سید جواد وايي: « زموږ ډېر خلک بې کاره دي، غوښته مو دا ده چې شتمن کسان دې هېواد کې پانګونه وکړي، هم به خلکو ته کار برابر شي او هم به وطن آباد شي.»
که څه هم هرات صنعتي ښارګوټي کې ورځ تر بلې پانګونې ته د پانګوالو لېوالتیا زیاتېږي، خو د برېښنا او خامو موادو کمښت یې د تولیدي فعالیتونو پر وړاندې جدي ننګونې دي.
