د عامې روغتیا وزارت “په خوراکي محصولاتو کې د تحلیل شویو خطرونو په موخه عامه پوهاوي” تر سرلیک لاندې غونډه جوړه کړه.
د عامې روغتیا وزارت مسوولین ټینګار کوي چې د بېکیفیته خوړو د مصرف له امله د بکټریايي، مکروبي او سرطاني ناروغیو پېښې د خوراک کوونکو ترمنځ ډېرې شوې دي. هغوی زیاتوي چې د خوړو د خوندیتوب ریاست تېر کال په هېواد کې د بېکیفیته خوراکي توکو له وارداتو، قاچاق او تولید څخه مخنیوی کړی.
دوی دا هم وایي چې دغه ریاست د نړیوالو سازمانونو په همکارۍ د خوړو د ملي او نړیوالو معیارونو د پلي کېدو او همداراز د عامه پوهاوي د لوړولو په موخه هڅې کوي، ترڅو خلک د بېکیفیته خوړو له خطرونو ځانونه وژغوري.
د خوړو خوندیتوب عمومي رییس عبدالله حامد وايي: « د خوړو خوندیتوب عمومي ریاست ژمن دی چې د خوړو د خوندیتوب نړیوال، ملي او سیمه ییز معیارونه او غوره عملیاتي تګلارې تطبیق کړي، ترڅو د خپلو مصرفوونکو روغتیا وساتو او د خوراکي توکو کارولو له امله رامنځته کېدونکې ناروغیو او دغه راز د تقلبي او قاچاقي خوراکي توکو مخنیوی وکړو.»
د دې وزارت د چارواکو په خبره، د روغتیا نړیوال سازمان ویلي چې په ټوله نړۍ کې هر کال شاوخوا ۶۰۰ میلیونه کسان د بېکیفیته خوړو له امله مسمومېږي چې ډېری یې ژوند له لاسه ورکوي.
دوی ټینګار کوي چې د دې ریاست د نظارت ټیمونه د عامه پوهاوي د لوړولو او د دې ډول موادو له تولید او وارداتو د مخنیوي په موخه په مختلفو سیمو کې حضور لري.
د خوړو د عامه پوهاوي او ظرفیت لوړونې متخصص سید نعمت حسینیان وايي: « د روغتیا نړیوال سازمان د مړینو هغه کچه او مصمومیتونه چې د بې کیفیته خوراکي توکو د مصرف له امله رامنځته کېږي، په کلني ډول ۶۰۰ میلیون تنه ګڼلي چې له ډلې یې ۱۲۵ میلیون تنه له ۱۸ کالو ښکته ماشومان دي.»
هممهاله، د عامې روغتیا وزارت چارواکي وايي، تېر کال د هېواد شاوخوا ۲۵۰ د خوړو تولیدي فابریکو څارنه شوې او ورسره یې په خوراکي توکو کې ۴۰ بېلابېل احتمالي خطرونه تثبیت کړي دي. د دوی په خبره، د دې ریاست د تخنیکي ټیمونو او متخصصینو تر څېړنو وروسته په تولیدي برخه کې تخنیکي ستونزې له فابریکو سره شریکې شوې دي، ترڅو د کیفیت د ښه والي لپاره لازم ګامونه پورته کړي.
د خوړو د تحلیل او څارنې آمر شفیقالله شفیق وايي: « په تېر یوه کال کې له شاوخوا ۲۵۰ کارخونو لیدنه شوې، اړوند لارښوونې ورته شوې؛ ترڅو په تولیدي خط کې شته خطرونو ته متوجه شي.»
په دې کنفرانس کې د عامې روغتیا وزارت چارواکو خبر ورکړ چې نږدې ۳۰۰ د خوراکي توکو تولیدي فابریکو ته یې قانوني جوازونه ورکړي او زیاتوي چې د ښوونځیو زده کوونکو او عامو خلکو لپاره یې د عامه پوهاوي کمپاینونه هم ترسره کړي، ترڅو خلک د خوراکي توکو د کیفیت او خوندیتوب په اړه لازم معلومات ترلاسه کړي.
