د تورخم دروازه له تېرو څو ورځو راهیسې د افغانستان او پاکستان ترمنځ د جګړې له امله تړل شوې.سوداګر او موټر چلوونکي وايي، له امله یې دوی ته په زیاته اندازه مالي زیانونه اوښتي. د دوی په خبره، پاکستان ته صادرېدونکې تازه مېوې او سبزیجات يې د دروازې بندېدو له امله خراب شوي.
تورخم کې یوتن موټر چلوونکی وايي: « سوداګرو، مال لرونکو او موټر چلوونکو ته سخته درنه ضربه ورسېده. په دې موټرو کې تازه ترکارۍ لکه رومیان او تازه مېوې لکه انګور او انار بار دي چې ټول خراب شول او درانه مالي زیانونه ورسېدل.»
د لارې یو موټر چلوونکي وايي: « موږ موټر چلوونکي یو، په دې لاره له ۱۰۰ تر ۱۵۰ زره روپیو محصول ورکوو او تازه سبزیجات مو بار کړي، خو ټول خراب شوي او سوداګرو ته زیات زیان ورسېد. موږ غواړو دروازه خلاصه او بیا بنده نه شي.»
په همدې حال کې یو شمېر سوداګر وايي، پاکستاني لوري تل د افغانستان د مېوو او سبزیجاتو په وخت کې په بېلابېلو بهانو د تورخم دروازه بندوي چې له امله یې د دواړه خواوو ترمنځ سوداګري اغېزمنیږي او دوی ته مالي زیانونه اوړي.
سوداګر د خبرو له لارې د ستونزې د حل او سوداګرو ته د اسانتیاوو په برابرولو ټینګار کوي.
د تازه مېوو او سبزیجاتو سوداګر ستانه ګل وايي: « زموږ سوداګرو ته هره ورځ میلیونونه افغان زیان رسېږي. زموږ کاروبارو د سبزیجاتو او مېوه جاتو په برخه کې دی، خو دا توکي ډېر نه شي ساتل کېدای. کله چې لارې پرې بندېږي، طبعا ً خرابېږي او تاوان رسوي.»
د تازه مېوې سوداګر عبد الغفار وايي: « هرکله چې د دولتونو ترمنځ ستونزه رامنځته کېږي، تاوانونه یې سوداګرو ته رسېږي. باید دولتونه خپلې ستونزې د خبرو له لارې حل کړي.»
د ننګرهار صنعت او سوداګرۍ ریاست مسولین هم مني چې د تورخم دروازې له تړل کېدو سره سوداګرو ته زیان اوښتی، خو د خلاصېدو په برخه کې د مسوولینو د هڅو خبر ورکوي.
د ننګرهار صنعت او سوداګرۍ ریاست د سوداګریزو چارو امر شاکرالله ستانکزی وايي: « د صنعت او سوداګرۍ ریاست هم په ولایتي سطحه له ولایت مقام سره په همغږۍ او هم وزارت مقام په دې هڅه کې دی چې لاره بېرته د سوداګرو پرمخ پرانیزي، ټرانزیټ او سوداګري پيل شي.»
دا لومړی ځل نه دی چې پاکستان ته صادرېدونکې تازه میوې او سبزیجات د پاکستان له لوري د تورخم دورازې تړل کېدو له امله خرابیږي بلکې تر ډېره د دغو صادرېدونکو توکو د پخېدو پر مهال هم یادې ستونزې رامنځته کیږي چې خلک او سوداګر يې پر دایمي حل ټینګار کوي.
