سعودي عربستان د دوشنبې په ورځ د اسلامي همکاریو سازمان بهرنیو چارو وزیرانو د فوق العاده غونډې کوربه و.
دغه غونډه په جدې ښار کې جوړه شوې وه او موخه یې په غزه کې د اسراییلو له لوري د پیل شوې نسل وژنې، بشري ناورین او جګړې سملاسي پای ته رسونه وه.
غونډه کې چې د ترکیې د بهرنیو چارو وزیر له لوري یې مشري کېده، له تېرو شاوخوا دوو کلونو راهیسې پیل شوې خونړۍ جګړې، د اسراییلو د ظلمونو، د قطر، مصر او د امریکا د سولې هڅو او بېړني اوربند په اړه ګډونوالو بېلابېلې څرګندونې درلودې.
د ترکیې بهرنیو چارو وزیر هاکان فیدان ویلي، د غزې له خلکو سره یوازې همدردي بسنه نه کوي بلکې د نوموړي په خبره، هغه څه چې فلسطینیان ورته تر بل هر وخت ډېره اړتیا لري؛ د دې سازمان د ګډونوالو ګډ عمل او له مظلمو فلسطینیانو هراړخیز ملاتړ دی.
فیدان زیاته کړې: « د قدس تاریخي هویت او مقام تر مستقیم برید لاندې دی؛ خو سره له دې هم هیلې او مسوولیتونه شته. موږ یو ځل بیا د فلسطیني وګړو او د هغوی د عادلانه مبارزې ترڅنګ د خپل کلک ملاتړ ژمنه کوو. د دوی مبارزه د آزادۍ، سولې، ثبات او دولت جوړونې لپاره ده. نن یوازې همدردي بسنه نه کوي، هغه څه چې فلسطینیان یې تر هر وخت زیات اړتیا لري، زموږ ګډ عمل دی. د اسلامي همکاریو سازمان غړو هېوادونو قوي شتون او په دې فوقالعاده غونډه کې د لوړ پوړو ګډونوالو ونډه، زموږ د یووالي پیاوړی ثبوت دی.»
نوموړي همدا راز اسراییل تورن کړل چې سوله نه غواړي بلکې یوازینۍ موخه یې د مظلومو فلسطینیانو له منځه وړل دي.
د ده په خبره، اسراییل باید نور خپلو ظلمونو ته د پای ټکی کېږدي او د سولې پروسه کې خپل عملي شتون ثابت کړي.
د ترکیې بهرنیو چارو وزیر په دې اړه ویلي: « په قدس کې د اسراییلو د وزیرانو په ګډون د افراطیانو پاروونکي ګامونه د الاقصی جومات سپېڅلتیا تر پښو لاندې کوي. موږ باید دې ته د پای ټکی کېږدو. زموږ بیړنۍ موخه دا ده چې یو دوامداره اوربند ترلاسه کړو او غزې ته پراخې بشري مرستې ورسوو. حماس د قطر او مصر وروڼو له خوا وړاندیز شوی اوربند پلان منلی. موږ به د قطر، مصر او د امریکا د سولې هڅو ملاتړ ته دوام ورکړو او له منځګړو سره به د مرستې لپاره خپله هڅه وکړو. اوس هر څه څرګند شوي، د اسراییلو حکومت سوله نه غواړي بلکې د فلسطین له منځه وړل غواړي.»
د غونډې نور ګډونوال بیا د اسراییلي رژیم له لوري د غزې جبري اشغال او روان ظلمونه د ټولې سیمې پر زیان ګڼي او په خبره یې، که مخه یې ونه نیول شي، لرې نه ده چې اسراییل غزه کې روان ناورین نورو هېوادونو ته هم وغځوي.
د ګینې د بهرنیو چارو وزیر موریساندا کویاټه: « د اسراییلو د پوځي کړنو او تېریو دوام، د فلسطیني خلکو جبري بې ځایه کول، وژنې او د ملکیتونو ورانول به د ټولې سیمې د سولې او امنیت د تحقق لپاره نه یوازې مرسته ونه کړي بلکې د ټولو پر زیان دي. هغه بشري ناورین چې اوس مهال په غزه او ټولو فلسطیني سیمو کې روان دی، هم ژور او هم ویجاړونکی دی چې نه یوازې په سیمه بلکې د اسلامي امت او ټولې نړیوالې ټولنې لپاره اوږدمهاله ناوړه اغېزې لري. د اسراییلو د ناقانونه او جبري اشغال تر ټولو ډېر زیان د ټولنې کمزورو قشرونو ته رسېږي.»
د اسلامي همکاریو سازمان داسې مهال جده کې د غزې په تړاو فوق العاده غونډه جوړوي چې د غزې روغتیا وزارت د وروستیو راپورونو پر بنسټ د جګړې له پیله تر اوسه شاوخوا ۶۰ زره وګړي د اسراییلو په بریدونو کې شهیدان شوي چې نېږدې ۸۳ سلنه یې عام وګړي دي.
