د خوست ولایت په یوه لرې پرته سیمه باک ولسوالۍ کې یوه حیرانوونکې ننداره. د زرګونه مینه والو په شتون کې د کرېکټ وروستۍ لوبې لیدو ته راټول شوي مینه وال چې ښایي دا د سیمه ییز کرېکټ پر کچه بې ساري وي.
یادې سیالۍ چې څو اوونۍ یې دوام وکړ، جوړونکي یې وایي، د دې ولایت له بېلابېلو سیمو په کې۵۰ لوبډلو برخه لرله.
د سیالیو یو تن جوړونکی رحمان ګهیځ وايي: « دا ټورنمنټونه د لرې پرتو سیمو و او عموما ً د سیمه ییز کرېکټ هغه ورک غمي چې په نړیوال کرېکټ کې ورته دروازې سترګې په لاره دي، د هغوی راپیدا کولو لپاره ډېرې مهمې دي. په دې برخه کې موږ له پانګوالو غوښتنه کوو چې په دې برخه کې پانګونه وکړي او موږ له محلي بال څخه ملي او نړیوال کرېکټ ته لاره پيدا کړو.»
اخوا ځینې لوبغاړي وایي، که اړونده ادارې په اطرافي سیمو کې د ورته سیالیو لپاره منظمې اسانتیاوې رامنځته کړي، دوی باور لري چې د هېواد پر کچه به ګڼ له سترګو پناه استعدادونه را برسېره شي.
د دوی په خبره، لا هم د لوبغالو او منظمو سیالیو په برخه کې ستونزو سره مخ دي چې باید د حل لپاره یې جدي هڅې وشي.
لوبغاړی نعمت متونوال وايي:« له همدې ځایه لوبغاړي راځي او بیا مخکې ځي. که څوک دلته ښه کرېکټ وکړي، هلته به هم ښه کرېکټر ترې جوړ شي. موږ له کرېکټ بورډ او چارواکو غوښتنه کوو چې دې ځوانانو ته کار وکړي او اطرافونو کې لوبغالي جوړ کړي.»
کرېکټ لوبغاړی عرفات عادل وايي: « په لومړي سر کې مو له دولت غوښتنه ده چې دې ډول لرې پرتو سیمو ته او ولسوالو ته ګرونډونه جوړ کړي، ترڅو ځوانان په کې کرېکټ وکړي. له شتمنو خلکو هم غوښتنه کوو چې پر محلي کرېکټ پانګونه وکړي.»
د خوست په باک ولسوالۍ کې د اتلانو جام په نوم د کرېکټ دا سیالۍ چې پای لوبه یې د متون اتفاق او منګل ستورو لوبډلو ترمنځ ترسره شوه، په کې متون اتفاق کرېکټ کلب وکولی شول د اتلولۍ په ګټلو سره د همدې سیالیو لپاره ځانګړی شوی موټر د جایزې په توګه ترلاسه کړي.
