د افغان غېږنېونکو ۱۸ کسیزې لوبډلې د رستمي غېږ نېونې له ۱۸ کلونو کم عمره نړیوالو آسیایي سیاليو کې يو د سرو زرو او دوه ـ دوه د نقرې او برنزو مډالونه وګټل.
د افغانستان د سامبو کورش فېډراسيون مسوولین وايي، افغان لوبغاړي محمد عمر د ۶۵ کيلوګرام وزن په کټګورۍ کې د روسي، کوربه ازبېکستان او قرغېزستان هېوادونو سیالو لوبغاړو په ماتولو سره د سرو زرو مډال تر لاسه کړ او د دې سياليو اتل شو.
د المپيک بدني روزنې او ورزش عمومي ریاست فني او مسلکي مرستیال احمد جان ځدراڼ وايي: « د کورش فېدراسیون محترم رهبري دشتي صاحب او د کورش مینه والو ته تبریکي وایو چې افغانستان ته یې یو نوی افتخار راوړ. دا زموږ د ادارې لپاره یو اعزاز دی، د ورزش ادارې لپاره یو افتخار دی، زموږ د ورزشکارانو لپاره افتخار دی او له کورش سربېره نورو فډراسیونونو ته هم افتخار دی.»
د کورش فېډراسیون رdیس سید محمود ضیا دشتي وايي: « دا یو ډېر ستونزمن کار دی، د افغانستان په اوسنیو شرایطو کې دا یوه لویه لاسته راوړنه ده. زموږ اتل محمد عمر عزیزي اوس زموږ تاسو منځ کې او د رهبرۍ له خوا به نن تقدیر شي.»
جاوېد کریمي بيا د وزن په همدې کټګورۍ کې خپلو ازبېکستاني، ترکمنستاني او قرغېزستاني سیالانو ته ماتې ورکړه، خو د خپل افغان سیال محمد عمرعزیز په وړاندې یې ماته وخوړه او د نقرې مډال یې ګټلی.
د سرو زرو مډال ګټونکی محمد عمر عزیز وايي: « زموږ په کټګوري کې ۱۲ تنه پهلوانان، درې تنه روزونکي او درې تنه هم لوبڅاران وو. موږ له دغو لوبو پنځه مډالونه راوړل چې یو یې د سروزرو، دوه د نقرې او دوه هم د برونزو دي. ما خپله د سروزرو مډال ترلاسه کړ. ما څلور سیالۍ وکړې چې په کې مې خپلو روسي، ازبېکستاني او قرغېزستاني سیالانو ته ماتې ورکړه. همدارنګه فاینل کې مې خپل افغان سیال ته هم ماتې ورکړه.»
بل پلو د فوټبال فېډراسیون رییس وایي، د افغانستان په تاریخ کې د لومړي ځل لپاره د فیفا له لوري پنځه لوبڅارانو ته د لوبڅارۍ معتبر سندونه ورکړل شوي چې له مخې به يې په نړيوالو لوبو کې لوبڅاري کولی شي.
د فوټبال فېډراسیون رییس محمد یوسف کارګر وايي: « پنځه نړیوال لوبڅاران چې د فوټبال د نړیوال فېډراسیون(فیفا) له خوا یې د لوبڅارۍ سندونه په رسمي توګه رارسېدلي او ځي به چې له افغانستان څخه د باندې لوبو لوبڅاري وکړي. دا ډېر د ویاړ ځای دی چې نن افغانستان د سپورټ په برخه کې لوی ځای لري.»
د کورش یادې سیالۍ د ۲۲ هېوادونو په ګډون د ازبېکستان په کوربه توب په نکوس ښار کې د روانې غبرګولي ( جوزا) میاشتې پر ۷مه پیل شوې وې او د يکشنبې پر ورځ پای ته ورسېدې.
