هند او پاکستان له شاوخوا څلور ورځنۍ مخامخ جګړې وروسته چې له امله یې دواړو لورو ته ځاني او مالي زیانونه واوښتل، تازه یې پر دوه اړخیز اوربند هوکړه کړې.
د دواړو هېوادونو ترمنځ جګړه چې په وروستیو کې د یو بل پر وړاندې د اټومي وسلو د کارونې ګواښونو ته رسېدلې وه، په سیمه کې د یو بل کړکېچ پراخېدو په تړاو اندېښنې زیاتې کړې وې.
د جګړې د درولو په تړاو د نړۍ او سیمې له پرله پسې جدي غوښتنو وروسته د هند بهرنیو چارو وزارت له پاکستان سره ډزبندي او د پوځي عملیاتو درول منلي؛ خو ویلي يې دي چې هېڅکله به د ترهګرۍ پر وړاندې چوپ پاتې نه شي.
د دې ترڅنګ، د هند بهرنیو چارو وزارت مرستیال وېکرم مسري ویلي، دواړه خواوې به د مې پر ۱۲ مه له یو بل سره خبرو ته کېني.
د هند بهرنیو چارو وزیرسوبرامانیم جی شنکر ویلي: « هند او پاکستان نن پر ډزبندۍ او د پوځي عملیاتو پر درولو هوکړې ته رسېدلي. هند په ثابت ډول د هر راز او هر ډول ترهګرۍ پر وړاندې کلک او نه تسلیمېدونکی دریځ لري او خپل دې دریځ ته به همداسې دوام ورکړي.»
د پاکستان لومړي وزیر هم په یوه ټویټ کې له هند سره د اوربند په مساله کې د امریکا له هڅو او په ځانګړي ډول د دې هېواد د ولسمشر ډونالډ ټرمپ له رهبرۍ او فعال رول مننه کړې.
شهباز شریف ویلي، دغه ګام یې د سیمې د سولې او ثبات او د هغو ستونزو د پراخېدو د مخنیوي په موخه پورته کړی چې په وینا یې کولی شي سیمه له ننګونو سره مخ کړي او له سولې، هوساینې او ثبات یې راوګرځوي.
شریف زیاته کړې:« موږ په سیمه کې د سولې لپاره د ولسمشر ټرمپ له رهبرۍ او فعالې ونډې مننه کوو. پاکستان پایلو ته د رسېدو په برخه کې د امریکا د هغو اسانتیاوو له برابرولو هرکلی او ستاینه کوي چې موږ د سیمې د سولې او ثبات د ګټو لپاره ترې ملاتړ وکړ.»
امریکايي چارواکي وايي، د هند او پاکستان ترمنځ اوربند د دې هېواد په منځګړیتوب او د ښکېلو اړخونو له لوړ پوړو چارواکو سره له دوه ورځنیو پرله پسې خبرو اترو وروسته، ټینګ شوی.
د امریکا بهرنیو چارو وزیر مارکو روبیو هم د اوربند په برخه کې د امریکا د رول ترڅنګ ویلي، دواړه خواوې په بې طرفانه ډول پر ګڼو موضوعاتو خبرو کولو ته تیارې شوې.
خو هند د امریکا په منځګړیتوب اوربند ته غاړه اېښودل نه دي منلي او وايي، دغه څه له مخامخ اړیکو وروسته شوي.
د امریکا ولسمشر ډونالډ ټرمپ په دې اړه ویلي: « له اوږدو خبرو اترو وروسته چې د امریکا په منځګړیتوب ترسره شوې، په دې خوښ یم چې هند او پاکستان له بشپړ او بېړني اوربند سره هوکړه وکړه. ډېر خوښ یم او مبارکي وایم چې دواړو هېوادونو په دې اړه له عقل او ځیرکتیا کار واخیست. مننه چې دې مسالې ته مو پام وکړ.»
له دې سره، ځایي رسنیو راپور ورکړی چې له اوربند وروسته د دواړو خواوو اوسېدونکي چې د جګړو له کبله د سیمو پرېښودو ته اړ شوي و، بېرته خپلو مېنو ته راستانه شوي.
ګڼو هېوادونو د هند او پاکستان ترمنځ د اوربند هرکلی کړی.
د سعودي عربستان، قطر، ترکیې او ګڼو نورو هېوادونو دغه څه نه یوازې د ښکېلو لوریو بلکې د سیمې د سولې او امنیت لپاره مهم ګام بللی.
د پاکستان پر وړاندې د هند سندور او برعکس د هند پر وړاندې د پاکستان ځوابي اقداماتو په بنیان المرصوص عملیاتو کې چې ګډې پولې ته څېرمه پر ملکي او پوځي سیمو شوي، لسګونه کسانو ته مرګ ژوبله هم اړولې ده.
