د هند بهرنیو چارو وزیر جی شنکر د پاکستان په تړاو په خپلو تازه څرګندونو کې ویلي، هغه ډلې چې دغه هېواد له کلونو راهیسې روزولې وې، اوس بېرته پر دې هېواد ورګرځېدلې دي.
دغه لوړ پوړی هندي چارواکی په پاکستان کې وروستیو ناامنیو او سیاسي کړکېچ ته په اشارې وايي، اسلام اباد په خپل اېښي دام کې بند شوی دی.
د شنکر په خبره، اسلام اباد له کلونو راهیسې د کابل پر وړاندې له دوه ګوني چلن کار اخیستی، خو له افغانستانه د بهرنیانو په وتلو سره دغه لوبه پای ته ورسېده.
شنکر زیاته کړې: « پاکستان د ترهګرۍ په خپور کړي جال کې راګیر دی. پاکستان اوس مهال په هغه لومه کې بند دی چې یو وخت یې په سیمې او افغانستان کې اچولې وه. په تېر کې پاکستان د افغانستان پر وړاندې له دوه ګوني چلن کار اخیسته، خو د امریکايي ځواکونو له وتلو وروسته دا دوه ګونې لوبه پای ته وروسېده او اسلاماباد ته اوس هغه ترهګري زیان رسوي چې له کلونو راهیسې یې روزلې وه.»
د پاکستان په تړاو د سیاسي چارو د شنوونکو نظر دا دی چې دا هېواد له تېرو پنځو لسیزو راهیسې په خپلو سټراټیژیو کې ترهګرۍ ته ځای ورکړی او د ګاونډيو ترڅنګ یې د سیمې په هېوادونو کې هم خلک نا آرامه کړي دي.
د سیاسي چارو شنونکی کمال ناصر اصولي وايي: « پاکستان په تېرو ۵۰ کالو کې په خپلو پالیسیو کې تروریزم ته ځای ورکړی و او د خاصو ډلو ټپلو په روزلو سره یې په افغانستان او د سیمې په ځینو هېوادونو کې د خلکو ژوند نا آرام کړی و، نظامونه یې پرې نړولي دي. په اوسني حالت کې یو شمېر ډلې په پاکستان کې هڅه کوي چې استقلال واخلي، ترڅو هلته شریعت نافذ شي. دا د یادو ډلو حق دی، دلته باید په ډېر څرګند ډول وویل شي چې تروریزم او حق باید له یوبل جلا شي. کوزه پښتونخوا کې او په بلوچستان کې خلک د خپل حق لپاره جګړه کوي؛ خو هغه ډلې ټپلې چې دوی د نورو ځایونو لپاره روزلې وې، موږ په ډېر ساحو کې ویلي دي چې تروریزم مه خپروئ، اما دوی نه ده منلې. بنا ً نن ورځ همدا تروریستي ډلې او د خپل حق غوښتونکې ډلې دواړه اړخونه په پاکستان کې شتون لري او خپله ښامار خپل ځان پرې خوري.»
په ټوله کې د شنونکو باور دا دی چې پاکستان له کلونو راهیسې د خپلو ګاونډیو هېوادونو د حکومتونو د تضعیف هڅه کوي او دې موخې ته د رسېدو لپاره یې د ترهګرۍ د روزنې او پالنې لار غوره کړې.
دوی زیاتوي چې پاکستان په دې برخه کې داسې ستراتیژۍ ته مخه کړې چې ښه راتلونکی نه لري.
د سیاسي چارو شنونکی ادریس محمدي ځاځی وايي: « پاکستان تل د نورو حکومتونو د ضعیفه کولو، کمزوري کولو او له غرب او په ځانګړې توګه انګلیس او امریکا د پروژو اخیستلو کې بوخت و. د دې پر ځای چې د خپل ولس پر اتحاد او اتفاق کار وکړي، پرخپل اقتصاد او سیاست کار وکړي، داسې سیاستونه، ستراتیژۍ او پالیسۍ یې پلي کول چې ښه راتلونکی یې نه درلود. اوس همدا ستونزې لویې شوې او پاکستان ته بلا ترې جوړه ده.»
پر پاکستاني پوځیانو او امنیتي ادارو بریدونه او چاودنې له بل هروخت اوس زیاتې شوې دي.
کتونکي يې د پاکستان د غلطو پالیسو پایله ګڼي، خو اسلام اباد بیا تل هڅه کوي چې د خپلو ناکامیو او ناسمو سیاستونو پړه پر نورو واچوي.
