په پاکستان کې د نا امنیو پر دوام، د خيبر پښتونخوا په بنو کې د پاکستاني ځواکونو پر مرکزونو موټربم بریدونه شوي.
د راپورونو له مخې، له بریدونو وروسته وسله والې نښتې هم رامنځته شوې دي .
په پاکستان کې مېشت آزاد خبریالان وايي، د بنو په برید کې لسګونه ملکي وګړي وژل شوي، خو پوځیانو او نورو امنیتي ځواکونو ته د اوښتې مرګ ژوبلې په اړه مالومات نه دي ورکړل شوي .
آزاد خبریال طاهرخان وايي: « په دې برید کې ۱۲ تنو ژوند له لاسه ورکړی او د ۳۰ په شاوخوا کې زخمیان دي. دا هغه کسان دي چې د چاودنو د شدت او زور له امله پرې چتونه، دېوالونه او ښيښې را پرېوتې دي. د برید پرمهال اکثریت خلک په کورونو کې وو او د روژه ماتي وخت و. د پاکستان د عسکرو او نظامیانو د مرګ ژوبلې په اړه څه نه دي ویل شوي، خو دا ویل کېږي چې برید کوونکي ۶ کسان وو او له برید وورسته د ډزو تبادله هم شوې.»
د سیاسي چارو کارپوهان بیا وايي، نه یوازې دا چې د پاکستان امنیتي وضعیت ترینګلی شوی بلکې دغه هېواد له سیاسي کاواکۍ سره هم مخ دی .
د دوی باور دا دی، که پاکستان د سیمې او په ځانګړې توګه د افغانستان پر وړاندې خپلې پالیسۍ بدلې نه کړي، لا زیاتو ستونزو سره به مخ شي او زیان به یې پر اسلام اباد سربېره، سیمې ته هم ورسیږي .
د پوهنتون استاد فیض محمد ځلاند وايي: « د پاکستان حالات ورځ تر بلې ترینګلي کېږي. دا یوازې په امنیتي برخه کې نه ده بلکې په سیاسي او اقتصادي برخه کې هم پاکستان له کاواکۍ او کمزورۍ سره مخ دی. پاکستان له تېرو ۷ لسیزو راهیسې د سیمې په اړه او په ځانګړې توګه د افغانستان په اړه د تروریزم د پالنې، د ترهګرۍ د روزنې او په لویه کې د نا امنۍ د ملاتړ ستراتیژي او پالیسي خپله کړې وه، خو هماغه پالیسي نه په کوردننه دوی د اور په لمبو سوځوي. ماته ښکاري، که د پاکستان نظامي او سیاسي مشرتابه په کورنیو مسایلو او د سیمې په تړاو په خپلو پالیسیو کې بدلون رانه وړي، پاکستان به له لا ژورو ستونزو سره مخ شي.»
ځينې نور بیا په دې اند دي چې اوس پاکستان د خپلو هغو سیاستونو پایلې ګوري چې له مخې یې له تېرو څو لسیزو راهیسې د ترهګرۍ روزنې او ملاتړ ته اوږه ورکړې او د نورو بې ثباتۍ لپاره ترې ګټه اخلي.
د سیاسي چارو شنونکی شهزاده مسعود وايي: « لکه څرنګه چې ځان ته د دایمي امن او ثبات غوښتونکي یو، دغه شان په سیمه کې هم د هر هېواد لپاره امن او ثبات غواړو. زما په اند، افراطیت ته د وده ورکولو، تجهیزولو او روزلو پایلې همدا شی وي.»
د سیاسي چارو شنونکی حکمت الله حکمت وايي، که پاکستان په واقعي مانا غواړي چې په هېواد کې یې د ناامنۍ ستونزې حل شي، خپل پوځ او استخبارات باید له سیاست لرې وساتي او د ترهګرۍ له روزنې او ملاتړ لاس واخلي .
هغه په دې اړه وايي: « د خپلو ولسونو او په ځانګړې توګه د پښتنو او بلوڅو پر وړاندې د پاکستان د پوځ او استخباراتو جګړه ظلم دی او د دې ظلم پر وړاندې هرڅوک چې درېږي، جګړه یې حق ده. که پاکستان غواړي چې خپلې امنیتي ستونزې حل کړي، باید د خپلو ولسونو حقه حقوق ورکړي، پوځ او استخبارات له سیاست ګوښه شي؛ دا یې د حل لاره ده، بله نه شته.»
په بنو کې د پاکستاني پوځ او پولیسو په مرکزونو د موټر بم بریدونو پړه د پاکستاني طالبانو د حافظ ګل بهادر څانګې منلې او پاکستاني پوځیانو ته یې د درنې مرګ ژوبلې اړولو ادعا کړې .
