د پاکستاني طالبانو تحریک(ټي.ټي.پي) د حقانیه داراالعلوم د مهتمم او د جمعیت علمای اسلام ګوند مشر مولانا حامد الحق حقاني ترور غندلی او زیاته کړې یې ده چې په پاکستان کې هغه دیني او سیاسي څېرې په نښه کېږي چې د حق خبره پورته کوي.
ټي.ټي.پي په یوه خپره کړې اعلامیه کې ویلي، په دې وروستیو کې په پاکستان کې هغه دیني عالمان او سیاسي مشران پر نښه کېږي چې د دې هېواد د استخباراتو او نورو پوځي ادارو د پالیسو پر ضد غږ پورته کوي.
ټي ټي پي د حامدالحق وژنه هم د پاکستان د استخباراتي ادارو د هغه سیاست دوام ګڼي چې له لارې یې په دې هېواد کې سیاسي او مذهبي قشر ځپل شوی دی.
د اعلامیې یوه برخه کې راغلي: « په دې وروستیو کې چې په دا ډول پېښو کې څومره هم حق ویوونکي علما او بالخصوص د ریاستي، استخباراتي او پوځي ادارو د پالیسو پر ضد غږ پورته کوونکي سیاسي او مذهبي مشران او مبارزین په نښه شوي، دا د هماغه ناپاکه او یهودي ډوله سیاست دوام دی چې د پاکستان وحشي او شیطاني استخباراتي ادارو د سیاسي او مذهبي طبقې د ځپلو لپاره خپل کړی.»
په ورته مهال، د افغاستان حکومت هم د مولانا حامد الحق وژنه غندلې او هیله یې څرګنده کړې چې په راتلونکي کې د داسې پېښو مخه باید ونیول شي چې دیني عالمان په کې قرباني کېږي.
د اسلامي امارت د ویاند مرستیال حمدالله فطرت وايي: « د افغانستان اسلامي امارت پر مرحوم مولانا صاحب حامدالحق حقاني دغه برید په کلکه غندي. د نوموړي شهادت د علمي حلقو لپاره یوه ستره ضایعه بولي او په اړه یې د مولانا صاحب درنې او علمي کورنۍ، شاګردانو او متعلقینو ته تسلیت وایي. الله تعالی دې له ظالمانو چې په سیمه کې د حق پرسته علماو پر ضد فعالیت کوي، د داسې ستر ظلم او جنایت انتقام واخلي او د بیا لپاره دې د ټولو علماء کرامو حفاظت وکړي.»
خو څارونکي بیا په دې باور دي چې په پاکستان کې مذهبي اختلافات خپل اوج ته رسېدلي او وروستی برید هم د دې ښکارندويي کوي چې د یو بل حذفولو ته یې مخه کړې.
د سیاسي چارو شنونکی شهسوار سنګروال وايي: « استخباراتو تل داسې لوبې کړې او کوي یې؛ ترڅو امریکا او جهان ته وښيي چې موږ د داعش قرباني یو، داعش ډله دلته خلک وژني او موږ یې تر شا ولاړ نه یو. غواړي په دې شکل یو دول سیاسي امتیازات ترلاسه کړي. تر ډېره بریده د دې امکان شته چې دا وژنه هم یوه استخباراتي لوبه وي او پاکستان په دغه شان لوبو کې ډېر ښه هنر او مهارت لري.»
د سیاسي چارو شنونکی عبدالواحد فقیري وايي: « د دې حملې له تازه حال او مالوماتو داسې ښکاري چې د پاکستان مذهبي ډلې د یو د بل په خلاف راپورته شوې دي، د دوی ترمنځ اختلافونه ډېر شوي او داسې حد ته رسېدلي چې د یو بل له منځه وړلو ته یې مخه کړې.»
د اکوړه خټک په جامع جومات کې د جمعې له لمانځه وروسته د یوه ځان وژونکي برید له امله د حقانیه دارالعلوم مهتمم او د جمعیت علمای اسلام ګوند مشر مولانا حامد الحق حقاني او څو تنه نورو ژوند واخیستل شو او یو شمېر نور ټپيان شول.
