د ننګرهار ولایت په مرکز جلال اباد ښار او څلورو ولسوالیو کې د هغو روغتیايي پروژو د بشپړولو چارې پیل شوې چې د مخکېني حکومت پر مهال نیمکړې پاتې وې.
د یاد ولایت عامې روغتیا ریاست مسوولین وايي، په دغو پروژو کې د بټي کوټ، روداتو، حصارک او شیرزادو ولسوالیو روغتیايي مرکزونه او د عامې روغتیا ریاست د ودانۍ د پاتې ۲۰ سلنه د چارو بشپړول شامل دي.
د ننګرهار عامې روغتیا رییس مولوي امین الله شریف وايي:« په جمهوریت کې یې ۲۰ سلنه کار پاتې و او ۸۰ سلنه کار یې بشپړ شوی و. نو عملا په دې باندې کار شروع کوو، ۳۴ یا ۳۵ خونې لري، په دې کې بېلابېلې څانګې دي چې هغه نسايي ولادي څانګه ده، بستر ده، د ماشومانو څانګه ده، مختلفې څانګې په دې کې شاملې دي. انشاء الله دغه ولسونه به له دې ګټه اخلي.»
چارواکي دغه راز ډاډ ورکوي چې نږدې وخت کې به د ختیځ روغتیايي کمپلکس پاتې کارونو د بشپړولو عملي کارونه هم پیل شي.
د ننګرهار مرستیال والي مولوي عزیزالله مصطفی وايي:« زموږ د صحت عامې ریاست رییس پر مشرۍ باندې او له مرکزه هم د مشرانو پر راتګ باندې به د مشرقي زون لپاره د زر بستر روغتون پرانیسته هم وشي. کارونه به یې شروع شي. تاسو عملا په ننګرهار کې لویې او کوچنۍ پروژې ګورئ چې شروع دي او ځینې یې د شروع کېدو په حال کې دي.»
ننګرهار مېشتي که له یوه لوري د دغه روغتیايي مرکزونو د چارو بشپړېدو ته خوښ دي، خو د روغتیايي پروسونل او درملو کمښت ستونزې ته په اشارې ټینګار کوي چې مسوولین باید دغې برخې ته هم پاملرنه وکړي.
د بټي کوټ روغتیايي مرکز موظف ډاکټر افسر خان وايي:« انشاء الله په دې سره به زموږ ټولې ستونزې حل شي او پر دې باندې موږ ډېر خوشاله یو.»
د بټي کوټ ولسوالۍ یو تن اوسېدونکی مجیب الرحمان وايي:« امبولانسونه، درمل او پرسونل دا ټول باید په نظر کې ونیسي. د نفوس په اندزه دلته د خلکو اړتیا ډېره ده.»
ننګرهار کې د روغتیايي مرکزونو د نیمګړو چارو د بشپړولو کارونه داسې مهال پیل کېږي چې تر دې وړاندې د ننګرهار په پنځو نورو ولسوالیو کې د ولسوالۍ پر کچه د روغتونونو د جوړولو چارې هم عملا پیل شوې دي.
