د افغانستان بانک، خصوصي سکټور او د سوداګرو استازي په کابل کې راټول شوي ترڅو د افغانیو د ثبات ساتلو په تړاو هر اړخیز بحثونه وکړي.
غونډه کې په دې خبرې کېږي چې څنګه او له کومو لارو کولی شي چې د بهرنیو اسعارو او په ځانګړې توګه امریکايي ډالرو پر وړاندې د افغانیو ثبات او ارزښت وساتي؟
د افغانستان بانک چارواکي وایي، هڅې یې پیل کړې چې له هېوادونو سره سوداګري په افغانيو وشي.
دوی زیاتوي، دغه هڅې د افغانیو د ثبات ساتلو لپاره دي او خلک دې هم ټولې راکړې ورکړې په افغانيو وکړي.
د افغانستان بانک لومړی مرستيال صدیق الله خالد وايي: « موږ له ټولو هېوادوالو غواړو چې د افغانیو په ثبات باور وساتي او له اړتیا پرته د په داسې حالاتو کې په اسعارو د افغانۍ مبادله نه ترسره کوي، ترڅو د بې بنسټه آوازو ښکار او متضرر نه شي. هېوادوالو ته ډاډ ورکول کېږي چې د افغانستان بانک کافي سرچینې لري او د بازار اسعاري اړتیاوې پوره کولی شي. د افغانستان بانک د اسعارو د قاچاق او مخینوي په برخه کې له اړوند ادارو سره په همغږۍ لازم ګامونه پورته کړي او دغه موارد په جدي توګه تعقیبوي.»
خصوصي سکټور د افغانیو د ثبات ساتلو په برخه کې د دې هڅو ستاينې ترڅنګ په بهر کې له مېشتو افغان پانګوالو غواړي چې له اوسني فرصت په ګټنې خپلې پانګې هېواد ته را ولېږدوي.
د دې سکټور استازي له نړيوالو هم غواړي چې د ستونزو حل لپاره دې پر افغانستان لګولي مالي بنديزونه لرې کړي.
د سوداګرۍ او پانګونې خونې مرستیال محمد یونس مومند وايي: « نړیوالې ټولنې داسې کار کړی چې د افغانستان د خصوصي سکټور پر انتقالاتو یې بنډیز لګولی او دا باید لرې کړي، بانکونه باید آزاد کړي. د دې کار فشار یوازې د افغانستان پر ملت پروت دی. موږ د حکومتونو په کار غرض نه لرو، دوی پوهېږي او تعامل یې؛ خو د افغانستان پر خصوصي سکټور باید بندیزونه لرې کړي، ترڅو موږ د خپلو صادراتو او وارداتو پیسې او د خامو موادو پیسې په اسانۍ سره انتقال کړو.»
د سوداګرۍ او پانګونې خونې د مدیره پلاوي غړی خانجان الکوزی وايي: « افغانستان ته چې کوم مشکل راغلی، بېرته ډېر ژر حل شو. موږ باید دې ته چمتوالی ونیسو، که په آینده کې له دې ډول ستونزو سره مخامخ کېږو، دا مسوولیت زموږ او په ځانګړې توګه د تجارانو، د خصوصي سکټور، د اسلامي امارت د مسوولینو او افغانستان بانک دی چې باید متوجه اوسو، ترڅو آینده کې زموږ خلک متضرر نه شي. باید خلکو ته امیدواري او اطمینان ورکړو او په دې یې ډاډه کړو چې وضعیت د ثبات په حال کې دی.»
د صرافانو سرتاسري شورا هم د افغانۍ د ثبات خونديتابه په برخه کې د خپلو هڅو يادونه کوي او زياتوي چې ياد ته هدف ته د رسېدو لپاره د کابل په شمول په نورو ولايتونو کې هم وخت ناوخت ډالر ليلام ته وړاندې کوي.
د افغانستان د صرافانو سرتاسري شورا ریيس بهرام خان ځدراڼ وايي: « د افغانستان بانک چې کومې وعدې کړې وې، هغه یې پوره کړې. زه امیدوار یم چې دوی به همدې کار ته ادامه ورکوي، ترڅو افغانۍ کافي ثبات پيدا کړي.»
سوداګر عبدالحفیظ رحماني وايي: « په دغو دوه درېیو ورځو کې چې افغانۍ د تحول په حال کې وه، موږ په دې اړه اندېښنه نه لرو. موږ د خپلې وچې مېوې کاروبار په افغانیو کوو او په دې تړاو هېڅ تشویش نه لرو.»
دا مهال یو امريکايي ډالر د ۷۴ افغانيو په مقابل کې تبادله کېږي. خو کله چې شاوخوا دوې اوونۍ وړاندې د امریکا له خوا د افغانستان په ګډون د نړۍ په اکثریت هېوادونو خپلې پراختیایي مرستې د درېیو میاشتو لپاره وځنډولې، افغانۍ د امریکايي ډالر پر وړاندې په تدريجي توګه ارزښت بايلود.
