تېره جنورۍ میاشت کې د ډالرو پر وړاندې د افغانیو ارزښت راښکته شو چې ورسره په ټول هېواد کې د لومړنیو او خوارکي توکو بیې هم لوړې شوې.
د هرات اوسېدونکي شکایت کوي، که څه هم اوس د افغانیو ارزښت لوړ شوی، خو لا هم د لوړو شویو خوراکو توکو بیې نه دي را ښکته شوې.
دوی له مسوولینو غوښتنه کوي چې پر بازار دې څار ډېر او د خوراکي توکو بیې دې راښکته کړي.
د هرات ښار یوتن اوسېدونکی حاجي شېر احمد وايي: « له اسلامي امارت غوښتنه کوو چې نرخونه کنټرول کړي، دلته ډېر غریب او بېوزله خلک شته، که نرخونه همداسې لوړ پاتې شي، هغوی به یې څنګه وپېرلی شي.»
د هرات یو بل اوسېدونکی وايي: « نرخونه لوړ دي او موږ د توکو د اخیستلو وس نه لرو او د کور لګښت نه شو پوره کولی.»
هټیوال هم د خوراکي توکو د بیو لوړوالی مني او زیاتوي، د بیو همدې لوړوالي یې بازارونه کمرنګه کړي دي.
هټۍ وال احمد سهیل وايي: « له هغې ورځې چې ډالر پورته تللی، فروشات ښکته راغلي او خلک د اخیستلو وس نه لري. یوه بشکه غوړي په ۹۰۰ افغانۍ و اوس په یو زر او ۱۰۰ افغانۍ دي. له دولت غوښتنه کوو چې ډالر له نرخونو حذف کړي، په افغانیو خرید وشي او په افغانیو وپلورل شي.»
هټۍ وال بسم الله وايي: « د تېر پرتله کاروبار خراب شوی، خلک بې وزله دي او د اخیستلو وس نه لري. په دې ورځو کې د خپل دوکان کرایه او لګښتونه نه شو پوره کولی.»
مسوولین پر بازار او پر نرخونو د دوامداره څارنې خبره کوي وايې، له احتکار کوونکو سره به جدي چلن وکړي.
د هرات ښاروالۍ ویاند عبدالهادي نوري وايي: « کمېسیون په اوونۍ کې دوه ځله له بازارونو لیدنه او کتنه کوي او نرخونه د ښاروالۍ په کنټرول کې دي. له دوکاندارانو هیله لرو چې احتکار ونه کړي، بلکې له ولس سره همدردي او همکاري ولري. له احتکار کوونکو سره به د ښاروالۍ له خوا جدي او قانوني چلن وکړي.»
هرات کې هغه مهال چې یو ډالر له ۸۰ افغانیو پورته تبادله کېده، د اوړو، غوړیو او وریجو بیو کې د ۲۰۰ څخه تر ۳۰۰ افغانیو لوړوالی راغی، خو اوس چې یو ډالر پر ۷۳ افغانیو تبادله کېږي، نرخونه ورسره نه دي راښکته شوي.
