د افغانستان کرېکـټ ملي لوبډله له زمبابوې څخه د درېیو لوبلړیو له ګټلو وروسته بېرته هېواد راستنه شوه.
ملي لوبډلې د دې سفر په پايله کې له زمبابوې هېواد د شل اوریزو، یو ورځنيو او ټېسټ لوبو لوبلړۍ وګټلې.
د کرېکټ بورډ مسوولین وايي، ملي لوبډلې د يادو برياوو ترلاسه کولو لپاره له وړاندې بشپړ چمتووالی نيولی و.
د کرېکټ بورډ ویاند نسیم سادات وايي: « دا د ویاړ ځای دی چې موږ موږ زمبابوې ته په ټولو سریزونو لکه شل اوریزو سیایلو، پنځوس اوریزو سایلو او ټېسټ کې ماتې ورکړه.»
د کرېکټ ملي لوبډلې روزونکی نورز منګل وايي: « خوشبختانه چې په هره لوبه او هر سریز کې افغان لوبډلې وکولی شول دغه سریزونه په خپل نوم کړي. باید ووایم چې دا لوبلړۍ د نویو لوبغاړو لپاره ډېر ښه فرصت و او تاسو ولیدل چې ځوان ښه وځلېدل.»
د کرېکټ ملي لوبډلې یو شمېر لوبغاړي راتلونکو سیایلو ته د خپل چمتوالي خبره کوي او وايي، هڅه کوي چمپینز ټرافي سیالیو کې ښه وځلېږي.
د ملي لوبډلې لوبغاړی نوید ځدراڼ وايي: «له زمبابوې سره مو یو ورځنیو لوبو سریز وکړ او دغه راز دوبۍ کې هم روزنیز کمپونه نیول شوي ترڅو چمپینز ټرافي لپاره چمتو شو. موږ د یو ورځنیو لوبو ډېر سریزونه وګټل، نور پوره چمتوالی لرو.»
د ملي لوبډلې بل لوبغاړی بشراحمد افغان وايي: «زه د ټېسټ لوبغاړی یم او هڅه کوم راتلونکي کې ډېره خواري وکړم ترڅو ایرلنډ او جنوبي افریقا سره د ټېسټ سریز لپاره چمتو شم.»
د کرېکټ بورډ مسوولین دغه راز وايي، ملي لوبډله د چمپيينز ټرافۍ لپاره هم چمتووالی لري. ټاکل شوې دغه لوبې په راتلونکې فبروري مياشت کې د پاکستان په کوربه توب پیل شي.
