د ترکیې په استانبول ښار کې د غالیو نړیوال نندارتون پرانیستل شو.
په دې نندارتون کې د ۱۹ هېوادونو سوداګرو د خپلو هېوادونو تولید کړې غالۍ او لاسي توکي نندارې ته وړاندې کړې دي.
د افغانستان د غاليو توليدوونکو او صادروونکو اتحاديې چارواکي وايي، دغه نندارتون د سې شنبې په ورځ (د جنوري په ۷مه) پیل شوی او د افغانستان په استازیتوب په کې يو شمېر سوداګرو وطني غالۍ نندارې ته وړاندې کړې دي.
د افغانستان د غاليو توليدوونکو او صادروونکو اتحاديې عامل ریيس عبدالمنان حیدري وايي: « په دې نندارتون کې د همدې لومړي سالون په شان چې زه په کې همدا اوس ولاړ یم، اووه نور سالونونه هم شته چې ټولټال اته سالونونه کېږي. په دې نندارتون کې د نړۍ له ۱۹ هېوادونو په لاس اوبدل شوې او ماشیني غالۍ نندارې ته وړاندې شوې دي.»
ورته مهال، افغان سوداګر وايي دا ډول نندارتونونه د افغاني تولیداتو لپاره ګټور دي او کولی شي افغاني غالیو ته په نړیواله کچه بازار موندنه وکړي.
یو افغان سوداګر وايي: « په دې نړیوال نندارتون کې زموږ د ګډون موخه دا ده چې د نړۍ په کچه دایمي پېرېدونکي ترلاسه کړو او د افغانستان د غالیو سکټور ته خدمت وکړو.»
د غالیو یو بل افغان سوداګر وايي: « زه له افغان حکومت په ځانګړې توګه له صنعت او تجارت وزارت څخه، همدارنګه د غالیو له صادروونکې اتحادیې څخه مننه کوم چې دا ډول فرصت یې موږ ته برابر کړی ترڅو دې ډول نندارتون کې برخه واخلو.»
د غالیو یو بل سوداګر خپل نظر داسې بیانوي: « دا ډېر ښه فرصت دی، له نورو هېوادونو نوي پېرېدونکي راځي او زموږ تولیدات ګوري. د افغانستان غالیو له اتحادیې مننه کوم او هیله لرم راتلونکي کې هم دا ډول فرصتونه برابر کړي.»
سوداګرو د اسلامي امارت له سرپرست حکومت غوښتنه کوي چې له نړیوالو سره په اقتصادې برخه کې تړونونه لاسلیک کړي، ترڅو افغاني تولیدات بهرنیو هېوادونو ته صادر شي.
حکومتی مسوولانو له دې وړاندې ډاډ ورکړی چې د سياست تر څنګ يې په اقتصادې برخه کې له ډېرو هېوادونو سره ښي اړیکې جوړې کړې او افغانې تولیداتو ته يې هم بازار موندنه کړې.
