افغانستان په دې وروستیو کې د ځان بسیاینې پر لور ګامونه تجربه کوي؛ د دې مزل ډېره برخه یې په کرنې او مالدارۍ ورټوله ده.
بله خوا، افغانستان یو له هغو هېوادونو هم دی چې په دې وروستیو څو کلونو کې یې د اقلیمي بدلون د منفي اغیزو له امله د پام وړ زیانونه لیدلي.
تازه «کرنه د سولې لپاره» موسسې ویلي، په افغانستان کې د اقلیمي بدلونونو د مخنیوي په برخه کې ۹ میلیارد ډالره پانګونه کوي.
د دې موسسې بنسټ اېښودونکي د اسلامي امارت د کرنې له سرپرست مولوي عطا الله عمري سره لیدنه کې ویلي، که د افغان حکومت چارواکي ورسره همکاري وکړي، نو په دې برخه کې به کوټلي ګامونه پورته کړي.
د کرنې، اوبولګولو او مالدارۍ وزارت ویاند مصباح الدین مستعین وايي: « د افغانستان اسلامي امارت د کرنې، اوبو لګولو او مالدارۍ وزارت محترم وزیر مولوي عطاالله عمري د کرنه د سولې لپاره موسسې له بنسټ اېښودونکي جېمز برټ او د موسسې له یو شمېر نورو مسوولینو سره د کرنې په وزارت کې وکتل. په دې لیدنه کې مولوي عطاالله عمري په پراختیايي پروژو کې د روڼتیا پر اهمیت ټینګار وکړ.»
مستعین زیاتوي، سرپرست وزیر د پروژو له پلي کوونکو غوښتي چې د افغان بزګرانو او خلکو ګټې لپاره باید د پروژو په پلي کولو کې له روڼتیا کار واخلي.
هغه په دې اړه وايي: « هغه بودیجه چې د افغانستان په نوم ځانګړې شوې وي، باید د پروژو د مسوولینو له خوا په شفاف ډول ولګول شي، ترڅو د افغان بزګرانو او خلکو پر ګټه تمامه شي. د افغانستان اسلامي امارت د کرنې، اوبو لګولو او مالدارۍ وزارت تل هڅه کوي چې د ملي او نړیوالو موسسو همکاري راجلب او په مرکز او ولایتونو کې بېلابېلې پروژې عملي کړي.»
په ورته وخت کې د اقتصادي چارو شنونکي بیا په افغانستان کې د دې ډول پروژو پلي کېدل ګټور بولي خو ټینګار کوي چې د دا ډول پروژو د پلې کولو لپاره باید اسانتیاوې رامنځته شي او په کې له ځوانو کادرونو هم ګټه پورته شي.
د اقتاصدي چارو شنونکی سید مسعود وايي: « په حقیقت کې د دوی دا حرکت او په دې برخه کې چې کاملا ً تازه او انساني ده، دا یوه نوې او تازه خبره ده چې په افغانستان کې منځته راځي. زه فکر کوم دغه کار یو له غوره کارونو دی، هیله لرم چې تطبیق شي او افغانستان یې په داخل کې داسې مدیریت کړي او سهولیتونه ورته برابر کړي چې دوی بیا بیا راشي.»
د اقتصادي چارو شنونکی سېلاب سمندر وايي: « دا چې نړیواله ټولنه غواړي د اقلیمي بدلون پروژې په افغانستان کې پلې کړي، دغه کار په افغانستان کې د اقلیمي بدلون په تړاو مؤثر تمامېدای شي او د افغانستان لپاره په اوسني چلنجي حالت کې یوه نغده عملي ګټه هم ده. حکومت باید دوی ته په ډېرو اسانه شرایطو د فعالیت اجازه ورکړي، خو د څار او د افغانستان د بشري کادرونو د استخدام په برخه کې دې لازم ګامونه پورته کړي.»
افغانستان د نړۍ له هغو هیوادونو شمېرل کېږي چې له اقلیمي بدلون یې زیات زیانونه لیدلي.
څو ورځې وړاندې د افغانستان چاپیریال ساتنې ملي ادارې چارواکو د آذربایجان په باکو کې نړیوال کنفرانس ته د وینا پرمهال ویلي چې افغانستان له اقلیمي بدلون سره د مبارزې لپاره ۲۰ میلیارد ډالرو ته اړتیا لري.
