افغان سوداګر د لومړي ځل لپاره بریالي شوي چې د افغانستان توليدات د استانبول حلال نندارتون کې نندارې ته وړاندې کړي.
دغه نړيوال نندارتون هر کال ترسره کېږي، خو سږکال يې په درېيم هغه کې د افغاني محصولاتو لپاره هم اته غرفې ځانګړې شوې دي.
د صنعت او سوداګرۍ وزارت سرپرست هم د سرپرست حکومت د یوه پلاوي پر مشرۍ په دې نندارتون کې د ګډون لپاره ترکيې ته رسېدلی.
د صنعت او سوداګرۍ وزارت ویاند اخندزاده عبدالسلام جواد وايي: « دغه نندارتون د ترکیې جمهوري دولت له خوا د اسلامي همکاریو سازمان په همکارۍ د څلورو ورځو لپاره د ترکیې په استانبول ښار کې جوړېږي. ۴۵ هېوادونه به خپل تولیدات او داخلي محصولات په ۴۵۰ غرفو کې نندارې ته کېږدي.»
د صنعت او سوداګرۍ وزارت سرپرست نورالدین عزیزي وايي، په دې نندارتون کې به په خپل ګډون سره له کوربه هېواد سره اقتصادي اړیکې لا پیاوړې کړي.
عزیزي زیاتوي: « موږ هڅه کوو له ترکیې سره خپلې تجارتي او اقتصادي اړیکې لا پراخې کړو. ځکه چې دا یو حقیقت دی چې د ترکیې هېواد له افغانانو سره له اقتصادي او سیاسي پلوه ښې اړیکې لري او غواړي له افغانانو سره راکړه ورکړه ولري.»
دا نندارتون د چهارشنبې په ورځ پیل شوی او څلورو ورځې به دوام وکړي. په دې نندارتون کې د نورو هېوادونو د توليداتو ترڅنګ افغاني غالۍ، د افغانستان قېمتي ډبرې، وچه مېوه او نور توليدات هم نندارې ته اېښودل کېږي.
د صنعت او سوداګرۍ وزارت ویاند اخندزاده عبدالسلام جواد وايي، د نندارتون په څنډه کې به سوداګريز کنفرانسونه، د چارواکو او سوداګرو ترمنځ ناستې او نور پروګرامونه هم ترسره شي.
هغه په دې اړه وايي: « د یادونې وړ ده چې له افغانستانه د ښاغلي عزیزي پر مشرۍ د خصوصي سکټور له ۳۰ ډېر غړي په دې نندارتون کې ګډون کوي او د افغانستان محصولات او تولیدات به د غالیو، قېمتي ډبرو، وچې مېوې، بانکوالۍ او ساختماني موادو په سکټورونو کې د ۸ غرفو په لرلو سره نندارې ته کېږدي.»
چارواکو له دې وړاندې ادعا کړې چې له سیمې او نړۍ سره يې اقتصادي اړیکې ښې شوې او غواړي د هوایي دهلېزونو په جوړولو سره ترکيې او اروپايي هېوادونو ته په مستقيمه توګه صادرات وکړي.
د اقتصادي چارو شنوونکي د استانبول په نړیوال حلال نندارتون کې د افغان سوداګرو ګډون، د سوداګرۍ د پراختیا او نړیوالو بازارونو ته د وطني تولیداتو د معرفي کولو لپاره ارزښتناک فرصت بولي.
د اقتصادي چارو شنونکی عبدالجبار ساپی وايي: « همدا نندارتونونه دي، همدا شرکتونه دي او همدا کنفرانسونه دي چې د دوو هېوادونو ترمنځ سوداګریزې اړیکې ټینګوي، تعامل زیاتېږي او په ځانګړې توګه د پانګونې لپاره لارې جوړېږي.»
تېر کال د استانبول په حلال نندارتون کې د ۶۰ هېوادونو د سوداګرۍ وزیرانو په ګډون، د ۱۲۵ هېوادونو سوداګرو، صنعتکارانو او پانګوالو ګډون درلود.
