د اتلانو جام (چمپينزټراپي) د سه شنبې پر ورځ د (۱۴۰۳ کال د لیندۍ پر ۶ مه) سهار له عربي متحده اماراتو افغانستان ته را وړل شو.
دغه جام به د درېيو ورځو لپاره د کابل او باميانو په ځينو تاريخي ځايونو کې د خلکو لپاره نندارې ته کېښودل شي.
د افغانستان کرېکټ ملي لوبډله به هم په ياد جام کې د برخه لرونکو لوبډلو ترڅنګ د لومړي ځل لپاره ولوبېږي او له همدې کبله افغان لوبدلې په چمپينز ټرافي سياليو کې د غوره لوبېدنې لپاره چمتووالی پيل کړی.
د کرېکټ بورډ ویاند سید نسیم سادات وايي: « د چپمینز ټرافي په اړه باید ووایم چې په دې جام کې اته لوبډلې ګډون لري. دا هغه لوبډلې دي چې په تېر ۲۰۲۳ کال ۵۰ اوریز نړیوال جام کې په لومړیو اتو لوبډلو کې راغلې دي. افغان لوبډلې په هغه جام کې غوره کارکردګي وکړه او پاکستان، انګلستان، سریلانکا او نیدرلنډ ته یې ماتې ورکړې او په پنځم او شپږم مقام کې مو ځای درلود. همدا لامل شول چې موږ د لومړي ځل لپاره په اتلانو جام کې ګډون کوو. دغه جام په ۵۰ اوریزه بڼه په پاکستان کې ترسره کېږي.»
همدارنګه، لوبډلمشر او یو شمېر لوبغاړي وایي، د پخوا پرتله په ملي لوبډله کې د لوبغاړو مسلکي لوبېدل لا زيات شوي او په خبره یې، په چمپينز ټرافي سياليو کې به د ټورنمېنټ ګټولو په موخه لوبېږي.
لوبډلمشر حشمتالله شهیدي وايي: « اوس هغه وخت راغلی چې موږ دغو لوبو ته ځو، دومره درناوی جوړ شوی چې مخالف ټیمونه ټول له موږ په ډار کې دي. کله چې موږ سره لوبې لري، ښه پلانېنګ کوي چې څنګه کولی شي له موږ لوبه وګټي.»
د ملي لوبډلی لوبغاړی صدیقالله اتل وايي: « زموږ د ټولو ګډې هڅې دي، څنګه چې د ټیم ماحول او کارکردګي ده، ډېره تمه شته چې په دې ټورنمېنټ کې ښې لوبې وکړو او تر بریا پورې ورسېږو. زموږ لوبغاړي ډېر زیات چمتو دي.»
د ملي ټیم لوبغاړي په چمپينز ټرافي کې د لوبېدو لپاره د چمتووالي ډاډ داسې مهال ورکوي چې تازه د ملي لوبډلې اووه لوبغاړي راشد خان، کریم جنت، نور احمد لکڼوال، عظمت الله عمرزی، رحمان الله ګربز، فضل الحق فاروقي او الله محمد غضنفر د هند په کورني لیګ (آی.پي.اېل) کې هم اخيستل شوي دي.
د کرېکټ ملي لوبډلې پخوانی لوبغاړی نوروز منګل وايي: « دا ښيي چې افغانستان کې استعداد شته. لکه څرنګه چې ما مخکې خبره وکړه چې زموږ د ټیم لاسته راوړنې ولې ښې دي؛ ځکه چې موږ ځوانان لرو او لپاره یې کار کېږي. کله چې آسیا کپ ایمرجېنګ ګټل کېږي، نو دا طبیعي خبره ده چې استعداد به لرو. دا د ځوانانو او د افغانستان د کرېکټ لپاره ډېر ښه زېری دی، ځکه ځوانان هڅول کېږي. څرنګه چې مخکې صادق صاحب خبره وکړه، کورنیو به موږ کرېکټ ته نه پرېښودلو خو اوس چې پلار ګورې، بچی یې ترلاس نیولی وي او کرېکټ پرې کوي.»
د چمپينز ټرافي په راتلونکي جام کې د افغانستان، بنګله دېش، اسټرالیا، پاکستان، هند، نیوزیلنډ، سویلي افریقا او انګلستان لوبډلې برخه لري.
ټاکل شوې دغه سيالۍ د پاکستان په کوربه توب د ۲۰۲۵ کال د فبرورۍ میاشت کې ترسره شي، خو ځينو رسنیو د هند کرېکټ بورډ د مسوولینو له قوله ویلي، پاکستان ته يې د خپلې لوبډلې له لېږلو سره مخالفت کړی.
نږدې مياشت وړاندې د کرېکټ نړيوالې شورا پاکستان ته تخنيکي ټیم لېږلی، ترڅو دغلته چمپينز ټرافي سياليو ترسره کېدو لپاره امنيتي وضعيت وارزوي.
