د پنجشنبې په ورځ د خیبرپښتونخوا په کورمه کې د اهل تشيع مسافرو د موټرو پر کاروان د ناپېژانده وسله والو له بريد وروسته، دغلته فرقه يي جګړو يو ځل بيا زور اخيستی.
د يادو جګړو په دوام، له شنبې تر يک شنبې سهار پورې دواړو خواوو ته ۲۱ نور کسان هم وژل شوي او په دې توګه په کرمه کې د فرقه يي جګړې د تازه څپې له پيل راهيسې د وژل شویو کسانو شمېر ۶۴ تنو ته رسېدلی.
د جګړې له شدت سره د خيبرپښتونخوا د پوليسو مشر، د عدلیې ايالتي وزير او یو شمېر نور چارواکي د وضعيت ارزولو او کابو کولو په موخه پاړه چنار ته رسېدلي او خبر يې ورکړی چې له دواړو خواوو سره يې د اوربند په اړه خبرې کړې.
کرمه کې پر جګړې سربېره، ښکېلو خواوو ځينې کسان چې ښځې او ماشومان هم په کې شامل دي، برمته نيولي او پاړه چنار ته ورغلو ايالتي چارواکو غوښتنه کړې چې ژر تر ژره دې ياد برمته کړای شوي کسان خپلو کورنيو ته وسپارل شي.
کارپوهان په کرمه کې دا وضعيت د پاکستان د پوځ او استخباراتو د پاليسيو پايله بولي او زياتوي چې هلته روانې فرقه يي جګړې هم د همدې پالیسيو زېږنده دي.
د چارو شنونکی ډاکټر عبدالصادق حمیدزوی وايي: « په دې باید هلته ټول پښتانه پوه شي چې دا جګړه د دوی نه ده بلکې دا یوه پردۍ جګړه ده او د پردیو د ګټو لپاره پیل شوی؛ پښتانه باید له احتیاط څخه کار واخلي. د پاکستان ناسمو پالیسیو دغه ستونزې او جګړې زیږولې دي.»
د پاکستان ډان ورځپاڼې راپور ورکړی چې پاړه چنار ته له پېښوره د پلاوي پر لېږدوونکې چورلکې ډزې شوي، خو چورلکې او په کې سپرو کسانو ته زيان نه دی اوښتی.
خو د پلاوي غړیو له ورځپاڼې سره په خبرو کې دا نه ده منلې چې پر چورلکې دې ډزې شوي وي.
د چارو ځيني نور شنونکي بیا د پاکستان حکومت په کرمه کې د روانو فرقه یي جګړو په مخنیوي کې پاتې بولي او د خلکو ورته خپلمنځي جګړو د ژر تر ژره مخنيوي غوښتنه کوي.
د چارو شنوونکی معین ګل څمکنی وايي: « دا چې ولې دغه جګړې منځته راځي، ډېر علتونه لري. په اوس وخت کې د پاکستان سیاسي، اقتصادي او نظامي وضعیت ته په کتو چې په نازک حالت کې دي، دا هم د دغو مسایلو د تشدید لامل دی.»
ځينې آزاد خبريالان بیا په کرمه کې د حکومتي چارواکو او د جګړې ښکېلو اړخونو ترمنځ د مذاکراتو د پيل خبر ورکوي او وايي، د خبرو وضعيت ته په کتو په دې مذاکراتو کې د پرمختګ امکان شته.
آزاد خبریال طاهر خان وايي: « د خیبرپښتونخوا د حکومت له خوا د چارواکو یو پلاوی تېره ورځ کرمې ته ورغلی او په پاړه چنار کې یې له شیعه مشرانو سره خبرې کړې. داسې احتمال شته چې له سني مشرانو سره هم خبرې وکړي. تازه معلومات همدا دي چې د پرمختګ امکان شته او هلته د روانې لانجې د حل لپاره لارې سمې شي.»
له دې سره، دیني عالمان د اسلام له نظره مذهبي جګړې ناورا بولي او په کرمه کې ژر تر ژره د جګړې پر پای ته رسېدو ټينګار کوي.
د یني عالم عبدالباري مدني په دې اړه وايي: « اسلام د مذهبي جګړو مخالف دی. هغه مذهبي جګړې چې په تاریخ کې تېرې شوې دي، په ټوله کې د مسلمانانو د ضعف سبب شوې او اصلي دښمن چې کفري نړۍ ده، له دې یې ښه ګټه پورته کړې او له دې لارې یې اسلامي نهضتونه او مذهبونه تر خپل اغېز لاندې راوستي.»
په کرمه کې پر فرقه یي جګړې سربېره ياده سيمه او نورو قبايلي سیمو کې ناامنیو خلک زیانمن کړي او تازه د کرمې له جګړې زرګونه کورنۍ د خونديتوب لپاره ټل ته ګډه شوې دي.
کوزه کرمه، خوار کلی، علیزي، صده، بې شرو او يو شمېر سيمې هغه ځايونه دي چې دا مهال په کې د شيعه او سني تر نامه لاندې د ځايي اوسېدونکو ترمنځ جګړه دوام لري. هغه څه چې د شنونکو په باور، د پاکستاني اسټبليشمنټ په اشاره پيل شوې او پر اور يې تېل هم پاشي.
